"Biznes mühiti və beynəlxalq reytinqlər üzrə Komissiya çərçivəsində daha səmərəli və çevik koordinasiya və kommunikasiyanın təşkili, eləcə də inklüzivliyin və vahid sinerjinin yaradılması məqsədilə 2024-cü il ərzində bir sıra islahatlar həyata keçirilir".
Oxu.Az xəbər verir ki, bu barədə "Caspian Energy Club"ın təşkilatçılığı ilə keçirilən "B2G Forum"da Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin İqtisadi islahatların monitorinqi, koordinasiyası və qiymətləndirilməsi sektorunun müdiri, Biznes mühiti və beynəlxalq reytinqlər üzrə Komissiyanın Katibliyinin rəhbəri Vüsal Şıxəliyev bildirib.
"Komissiya tərəfindən bu günə qədər xeyli sayda islahatlar həyata keçirilib. Bu islahatlar bu gün də davam etdirilir. Məsələn, daşınmaz əmlakın ilkin qeydiyyatı üzrə elektron sistem yaradılacaq. Ümidvaram ki, yeni layihə daşınmaz əmlak bazarında qeydiyyat prosesini asanlaşdıraraq, bu sahənin inkişaf potensialını əhəmiyyətli dərəcədə artıracaq", - Vüsal Şıxəliyev qeyd edib.
