"Prezidentin dəstəyi ilə qurulan Aqrar Sığorta Fonduna təşəkkür edirəm. Aqrar sığorta bütün dünyada, kənd təsərrüfatı inkişaf etmiş ölkələrdə çox vacib dəstək mexanizmidir. Azərbaycanda da bu sahəyə dövlət təşviqinin göstərilməsi fermerlər üçün çox böyük üstünlükdür".
Oxu.Az xəbər verir ki, bu sözləri Azərbaycanda meyvə bağlarında ən böyük sığorta ödənişi alan təsərrüfatın mütəxəssisi Ahmet Turqut bildirib.
O, sığorta hadisəsinin başvermə səbəblərinə aydınlıq gətirib:
"Bizim müxtəlif rayonlarda fərqli bağlarımız var və hamısı sığortalanıb. Lakin Xaçmazda yerləşən nektarin bağımızda ağacları şaxta vurdu. Digər bağlarda heç bir problem yaşanmadı. Təbiət hadisəsi nə zaman, hansı formada baş verəcək - bilinmir, buna görə də riskləri nəzərə alaraq bütün təsərrüfatlarımızı sığortalayırıq. Fermerlərə də tövsiyəm budur ki, Aqrar Sığorta Fondunu diqqətlə araşdırsınlar, nümayəndəliklərlə əlaqə saxlayıb ətraflı məlumat alsınlar. Çünki bu məsələ həm ölkənin iqtisadi inkişafı, həm də qida təhlükəsizliyi üçün çox önəmlidir. Biz burada meyvə yetişdirməklə insanlara iş yeri yaradırıq, yetişdirilən məhsullar isə Rusiya, Belarus, Birləşmiş Ərəb Əmirlikləri də daxil olmaqla müxtəlif ölkələrə ixrac olunur və ölkəyə xarici valyuta gətirir. Bu, yalnız bir fermerin deyil, dövlətin məsələsidir".
"Hadisəyə gəldikdə isə şaxtavurma martda baş verib. Bağlarımızda öz meteoroloji stansiyalarımız var və bütün dəyişiklikləri dəqiqəbədəqiqə izləyirik. Həmin gün heç bir şaxta proqnozu olmasa da, tumurcuqdan meyvə görünənə qədər hər zaman təhlükə vəziyyətində oluruq. O gün saat 11-də temperaturun mənfi 0.5-ə düşdüyünü gördük və dərhal xüsusi aparatları işə salmaq qərarı verdik, bağa su verdik. Bu üsul torpağın temperaturunu yüksəldərək bitkini qismən qoruyur. Bütün tədbirlərə baxmayaraq, xüsusən faraş sortlarda şaxta zərəri yarandı.
Aqrar Sığorta Fondu isə hadisədən dərhal sonra əraziyə gəldi, baxış keçirdi, sənədləşmə aparıldı və proses izlənilərək sonda sığorta ödənişi təmin olundu. Bu dəstəyə görə bir daha təşəkkür edirəm və bütün fermerləri bağlarını mütləq şəkildə sığortalamağa çağırıram", - A.Turqut bildirib.
Xatırladaq ki, Xaçmaz rayonunun Nabran qəsəbəsində yerləşən nektarin bağına dəyən ziyana görə ASF 712 min manat dəyərində sığorta ödənişi edib.
Elmidar Əliyev
