Məhkəmə hakimi: Hərə özü üçü bir dövlət yaradıb

Bu gün Bakı Ağır Cinayətlər Məhkəməsində dələduzluq və mənimsəmədə təqsirləndirilən 1984-cü il təvəllüdlü Araz Eyvazovun cinayət işi üzrə növbəti məhkəmə prosesi keçirilib.

Oxu.Az Virtualaz.org-a istinadən xəbər verir ki, prosesə hakim Azad Məcidov sədrlik edib.

Prosesdə şahid qismində dindirilməli olan şəxslərin heç biri məhkəməyə gəlməyib. Hakim cinayət işində adı hallanan Vüsal Cəfərov barədə cinayət işi başlanacağını bildirib.

Hakim Azad Məcidov həmçinin şahid Əsban Hüseynovla bağlı polisə məcburi gətirilmə haqqında etdiyi müraciətə də cavab ala bilmədiklərini qeyd edib:

"Qanunda var ki, məhkəmənin verdiyi qərarlar bütün orqanlar, hüquqi, vəzifəli və fiziki şəxslər üçün məcburidir. Bu tələb yerinə yetirməlidir. Əks halda həmin şəxslər bununla bağlı cinayət məsuliyyəti dayışıyırlar. Polis məhkəmə qərarını icra etmir, heç cavab da yazmır. 

Qanunvericiliyə əsasən, məhkəmə qərarı icra olunmasa, cinayət işinin açılması nəzərdə tutulub. Biz avqustun 31-də Dövlət Gömrük Komitəsinə sorğu göndərmişik. Amma hələ də cavab yoxdur. Biri deyir "Proctel&Gamble" böyük şirkətdir, oradakılar böyük adamlardır, məhkəməyə gəlmirlər. Biri deyir heç bir sənədə cavab vermir. Hərə özü üçü bir dövlət yaradıb. Qanunvericilikdə 508-ci maddədə göstərilib ki, məhkəmə sorğularına cavab verilməlidir".

Məhkəmə prosesi noyabrın 4-də davam edəcək.

Qeyd edək ki, hadisə 2012-ci ildə baş verib. Məsələ ilə bağlı bir il ibtidai istintaq aparılıb. İş bir dəfə məhkəmədən geri göndərilib. Cinayət işi üzrə zərərçəkmiş şəxs qismində Şərurun keçmiş icra başçısı Rəfael Rəsulovun oğlu Orxan Rəsulov, Polis Akademiyasının keçmiş rəisi, general-mayor Ramiz Nağıyevin oğlu Tağı Nağıyevin, "Şərur" mənzil-tikinti kooperativinin rəhbəri İsfəndiyar Axundovun ("Şərurlu İsfəndiyar") qardaşı oğlu Eldəniz Axundov tanınıblar. Ümumikdə Araz Eyvazovun 3 milyon 600 min manat pulu mənimsədiyi bildirilir. O, Cinayət Məcəlləsinin 179 (mənimsəmə) və 178.3.2-ci (külli miqdarda dələduzluq) maddələri ilə ittiham olunur.

E.Ə.
www.oxu.az