Rusiyanın Lipetsk şəhərində yaşayan Nikolay Şubin adlı evsiz küçədə yaşamasına baxmayaraq, şahmatı böyük həvəslə oynayır və yoldan ötənləri oyuna dəvət edirdi. Lakin onun xoş görünüşünün altında qorxunc bir sirr gizlənib: O, şahmat oyununda qalib gələnləri amansızcasına qətlə yetirirdi...
Oxu.Az-ın verdiyi məlumata görə, bu barədə aif.ru xəbər verib.
Araşdırmalar nəticəsində məlum olub ki, 1954-cü ildə Tbilisidə anadan olan Nikolay gəncliyində Voronej vilayətinə köçüb və orada gizli cins şalvar istehsalı ilə məşğul olub, uzun müddət bundan yaxşı pul qazanıb.
Lakin 1984-cü ildə gizli şirkət ifşa olunub, Şubinin özü isə alverçiliyə görə dörd il həbs cəzası alıb. Bir müddət "nevrasteniya" diaqnozu ilə Voronej vilayət klinik psixonevroloji dispanserində müalicə olunub. Koloniyada cəmi iki il keçirib, sonra azadlığa çıxıb və evlənib. Lakin nikah uzun müddət davam etməyib. Tezliklə o, arvadından ayrılıb və Lipetskə köçüb. Orada əvvəlcə bağ evlərində yaşayıb, sonra isə küçədə, avtobus dayanacaqlarından birinin yaxınlığında məskunlaşıb.
Şahmat oynamağa dəvət edirdi
Nikolay həm də şahmatı çox sevib. Üç il ərzində o, Lipetskin əsas parkına gəlir və onunla oynamağa razı olanları gözləyirdi. Bəzən yoldan keçənlərə bir partiya şahmat üzərində onunla birlikdə bir şüşə içki içməyi təklif edib. Daha çox da tənhalar, içki aludəçiləri və ya evsizlər razılaşsalar da, aralarında sadə pensiyaçılar da olub. Bunlardan biri də Viktor Meşşeryakov idi. O, bir neçə il ərzində dəfələrlə Şubinlə oynamışdı. Sonra Meşşeryakov yoxa çıxıb. Qohumları milisə müraciət etdilər və itkin düşən pensiyaçının izi tezliklə istintaq işçilərini həmin parka gətirdi. Şahidlər bir şeydə həmfikir idilər: onu son dəfə məhz Şubinin yanında görmüşdülər. Tutulandan sonra Şubin istintaqda oyun yoldaşını öldürdüyünü etiraf edib, səbəb kimi isə şahmatda onu məğlub etməsini göstərib. Səbəb tamamilə yersiz görünsə də, Şubin üçün tamamilə məqbul idi. Müstəntiqlə söhbət edərkən o, birdən etiraf edib: "Mən həmişə qalib gələnləri öldürürəm".
Qalibləri boğurdu
Beləliklə, Lipetsk milisi özü üçün gözlənilmədən əsl manyakı tutub. Məlum olub ki, Şubin şahmatı sevib, lakin çox pis oynayıb. Məğlubiyyətdən sonra isə həmişə çox kədərlənib və rəqibinin başına ağır bir şeylə zərbə endirib. Həmin adam huşunu itirəndə Şubin onun əl və ayaqlarını həmişə yanında gəzdirdiyi məftillə bağlayır, sonra isə insan özünə gələnə qədər gözləyir və ona düzgün yaşamadığı barədə uzun bir nəsihət verirdi.
Bundan sonra isə sadəcə boğurdu. Heç bir göz yaşı, yalvarış və ya təhdid bu ssenarini dəyişdirə bilmirdi. Şubinin dəqiq fəaliyyət planı var idi. O, bu plandan yalnız bir halda kənara çıxırdı: özü qalib gələndə.
"Bu dünyanı şərdən təmizləyir"
2004-2006-cı illər arasında o, 11 qətl törədib, lakin qurbanları tənha marginallar olduğundan, 2006-cı ildə həbs olunana qədər onların əksəriyyətinin yoxa çıxması barədə heç kim şübhələnməyib.
Şubinin özü 13 qətli etiraf edib. Ən maraqlısı o idi ki, o, cəsədləri təxminən eyni yerdə basdırırdı, buna görə də özünü "qəbiristanlıq direktoru" adlandırıb.
Tibbi ekspertiza ona "paranoid şizofreniya" diaqnozu qoyub. Buna görə də ekspertiza nəticələrinə əsasən o, qeyri-məsul hesab edilib və məcburi müalicəyə göndərilib.
