Xaçmazda avtomobili narkotik və spirtli içkinin təsiri altında idarə edən 25 sürücü aşkar olunub

Rayon ərazisində kobud qayda pozuntularına yol verən sürücülərə qarşı profilaktik tədbir keçirilib.

Oxu.Az xəbər verir ki, Daxili İşlər Nazirliyi (DİN) məlumat yayıb.

Bildirilib ki, Xaçmaz Rayon Polis Şöbəsinin Dövlət Yol Polisi Bölməsinin əməkdaşları tərəfindən rayon ərazisində yol hərəkəti təhlükəsizliyinin təmin edilməsi məqsədilə profilaktik tədbirlər keçirilib. Son 5 gün ərzində keçirilən tədbirlər zamanı avtomobili narkotiklərin təsiri altında idarə edən 14 sürücü saxlanılıb. Tibbi müayinə zamanı onların narkotik vasitə qəbul edərək sükan arxasında əyləşdikləri müəyyən olunub. Sürücülər barəsində toplanan materiallara hüquqi qiymət verilməsi üçün məhkəməyə göndərilib və hər biri 25 sutka inzibati qaydada həbs edilib.

Tədbir zamanı avtomobili spirtli içki qəbul edərək idarə edən daha 11 sürücü müəyyən olunaraq saxlanılıb. Həmin sürücülər barəsində qanunla nəzərdə tutulan qaydada inzibati protokol tərtib olunub.

Xaçmaz rayonu ərazisində yol hərəkəti təhlükəsizliyinin təmin edilməsi məqsədilə profilaktik tədbirlər mütəmadi olaraq həyata keçiriləcək.

Xaçmazda avtomobili narkotik və spirtli içkinin təsiri altında idarə edən 25 sürücü aşkar olunub