1949-cu ildə Türkiyənin Ordu vilayətinin Fatsa rayonunda doğulan Kadir İnanır Marmara Universitetini bitirdikdən sonra "Fotoroman Artisti" müsabiqəsində qalib gələrək incəsənət aləminə addım atıb.
O, ilk böyük uğurunu 1970-ci ildə "Qara gözlüm" filmi ilə qazanır. Bu ekran işində onun tərəf müqabili Türkan Şoray olur. Kadir İnanır və Türkan Şoray sonrakı illərdə "Yeşilçam" tarixinin ən uğurlu ekran cütlüklərindən biri olur.
Bu barədə Baku TV-nin videomaterialında deyilir.
Çingiz Aytmatovun əsəri əsasında çəkilən "Sərvi boylum, al yazmalım" daxil olmaqla 180-dən çox filmdə rollar ifa edən sənətçi çoxsaylı "Ən yaxşı kişi aktyor" mükafatlarına layiq görülüb.
Şəxsi həyatında aktrisa Jülide Kuralla təqribən qırx illik bir münsaibət yaşayan aktyor həm də fəal ictimai mövqeyi ilə seçilib.
2021-ci ildən etibarən ciddi sağlamlıq problemləri ilə mübarizə aparan Kadir İnanır 2026-cı il iyunun 26-da 77 yaşında ağciyər xərçəngi və pnevmoniyadan vəfat edib.
İyunun 28-də İstanbulda keçirilən vida mərasimindən sonra torpağa tapşırılan Kadir İnanırın xatirəsi canlandırdığı unudulmaz obrazlar və türk kinosuna verdiyi töhfələrlə yaşayır.
