Danimarkada arxeoloqlar 225 il əvvəl batmış hərbi gəminin qalıqlarını aşkar ediblər.
Oxu.Az-ın SCMP-yə istinadən xəbərinə görə, bu barədə sualtı ekspedisiyanın iştirakçıları məlumat veriblər.
Tədqiqatçıların məlumatına görə, söhbət 1801-ci ildə tarixi Kopenhagen döyüşü zamanı suda qərq olmuş "Dannebroq" gəmisindən gedir. Gəmi limanın akvatoriyasında təxminən 15 metr dərinlikdə yerləşir. Sıx lil təbəqələri və demək olar sıfır görünüş məsafəsi işləri çətinləşdirir.
"Bu, Danimarka milli kimliyinin vacib bir hissəsidir", - deyə dəniz arxeologiyası şöbəsinin müdiri Morten Yohansen bildirib.
O deyib ki, aşkar edilmiş qalıqlar o dövrün döyüşlərinin necə keçdiyini daha yaxşı başa düşməyə kömək edə bilər. Onun sözlərinə görə, əvvəllər məlumatlar əsasən şahid ifadələrinə əsaslanırdı.
Qeyd olunur ki, 1801-ci il münaqişəsinin mərkəzində olan 48 metrlik gəmi Qoratio Nelsonun komandanlığı altında Böyük Britaniya qüvvələri tərəfindən hücuma məruz qalıb. İntensiv artilleriya atəşi gəminin alovlanmasına və partlamasına səbəb olub. Saatlarla davam edən döyüşdə minlərlə insan ölüb və yaralanıb.
Dəniz arxeoloqları qəza yerində toplar, uniformalar, fərqlənmə nişanları, ayaqqabı və butulkalar kimi şəxsi əşyalar da daxil olmaqla, əlamətdar artefaktlar aşkarlayıblar. Dalğıclar həmçinin dənizçilərdən birinin çənə sümüyünə aid hissə də tapıblar.
