Şəkidə İpək Yolu XIII Beynəlxalq Musiqi Festivalının bağlanış mərasimi keçirilib

"Marxal" istirahət kompleksinin Yay Teatrında Şəki İpək Yolu XIII Beynəlxalq Musiqi Festivalının bağlanış mərasimi keçirilib.

Oxu.Az-ın məlumatına görə, üç gün davam edən və İndoneziya, Hindistan, Türkiyə, Qazaxıstan, Rusiya, Azərbaycan musiqiçilərinin parlaq konsert nümunələri ilə müşayiət edilən festival şəhər sakinlərində və turistlərdə unudulmaz təəssürat yaradıb.

Final gecəsində Fikrət Əmirov adına Dövlət Mahnı və Rəqs Ansamblının, həmçinin Azərbaycan Dövlət Xalq Çalğı Alətləri Orkestrinin üzvləri çıxış ediblər.

Konsert Azərbaycan musiqi sənətinin görkəmli xadimləri, bəstəkarlar Süleyman Ələsgərovun və Şəfiqə Axundovanın 100 illik yubileyinə həsr edilib.

Xalq artisti Ağaverdi Paşayevin rəhbərlik etdiyi orkestrin üzvləri Azərbaycan bəstəkarlarının əsərlərini və xalq mahnılarını ifa ediblər.

Solistlər Əməkdar artistlər Almaz Orucova (xanəndə), Xəyyam Məmmədov (kamança), Çinarə Heydərova (qanun), həmçinin Vəfa Vəzirova, Nurlana Abdullayeva, Taleh Yəhyayev, Səbinə Ərəbli, Sərxan Bünyadzadə və Zabitə Əliyeva olub.

Konsert tamaşaçıların sürəkli alqışları ilə başa çatıb.

Məlumat üçün qeyd edək ki, tədbirdə Şəki Şəhər İcra Hakimiyyətinin başçısı Elxan Usubov, festivalın bədii rəhbəri, UNESCO-nun "Sülh uğrunda artisti", bəstəkar Firəngiz Əlizadə, TÜRKSOY-un Azərbaycandakı daimi nümayəndəsi Elçin Qafarlı, eləcə də yerli sakinlər və turistlər iştirak ediblər.

Əlavə edək ki, festival Azərbaycan Mədəniyyət Nazirliyi, Azərbaycan Bəstəkarlar İttifaqı və Şəki Şəhər İcra Hakimiyyətinin birgə təşkilatçılığı ilə keçirilib.

Firəngiz Ağalarova