"Azərbaycan qoşunları həm 2016-cı il Aprel döyüşlərində, həm də 2020-ci ildə 44 günlük müharibədə öz gücünü göstərdi".
Oxu.Az xəbər verir ki, bunu "Qarabağ uğrunda müharibə: Strategiya, texnologiya və qələbə" kitabının həmmüəllifi Con Spenser qeyd edib.
O qeyd edib ki, kitabın hazırlanması məqsədilə müharibə iştirakçıları olan komandirlər və hərbi zabitlərlə müsahibələr aparılıb:
"2021-ci ildə Azərbaycana səfər etdik, hərbi əməliyyatların aparıldığı zonaları gəzdik. Bu səfərdə müharibədə iştirak edən komandirlərlə danışdıq. Həmçinin ərazinin xəritəsini çıxarıb vizuallaşdırmağa çalışdıq. Bu, asan deyildi. Kitabda da qeyd etdik ki, Azərbaycan ərazilərini daim diplomatik yolla qaytarmağa çalışıb, ancaq sonda öz legitim ərazilərini hərbi yolla azad etməyə nail olub".
C. Spenser vurğulayıb ki, kitabda təkcə 44 günlük müharibə yox, həmçinin Aprel döyüşləri barədə araşdırmalar qeyd edilib.
"Kitabda Lələtəpə və Talış yüksəkliklərinin strateji önəmi barədə də məlumat verilib. Bu yüksəkliklər 2020-ci ildə 44 günlük müharibədə böyük rol oynayıb".
Qeyd edək ki, "Qarabağ uğrunda müharibə: Strategiya, texnologiya və qələbə" kitabı iki il ərzində yazılıb. Azərbaycanın 44 günlük müharibədə qələbəsi barədə xaricdə ilk geniş və sistemli hərbi tədqiqatdır və xaricdə hərbi araşdırmalar sahəsində ixtisaslaşmış Vest Point Hərbi Akademiyasının mütəxəssisləri tərəfindən hazırlanıb.
Kitab hazırlanarkən 100-ə qədər hərbi və mülki mütəxəssislə müsahibələr aparılıb. Bundan əlavə, əsas döyüşlərin getdiyi bütün ərazilərə yerində baxış keçirilib.
Kitabın müəllifləri Liam Kollins və Con Spenserdir.
