“Addım Gənclər Təşkilatı”nın təşkilatçılığı ilə Norveçdə yaşayan azərbaycanlı modelyer Şervin Nəcəfpurun Bakının prestijli əyləncə məkanlarının birində (Pasifico club) “Atropatena Fashion Night” adlı moda nümayişi baş tutub.
Oxu.Az xəbər verir ki, gecədə modelyerin eksklüziv olaraq Bakı dəfiləsi üçün hazırladığı klassik və milli elementlərlə zəngin 30-a yaxın geyimi nümayiş olunub. Geyimləri Lyubov Gutorovanın rəhbərlik etdiyi FMS model agentliyinin modelləri nümayiş etdirib.
Gecəni giriş sözü ilə “Addım Gənclər Təşkilatı”nın sədri Hüseyn Cavadzadə açıb və gənc modelyerin yaradıcılıq üstünlüklərindən, diasporamızda məhsuldar fəaliyyətindən və vətənpərvərliyindən danışıb. Daha sonra Norveç Krallığının Bakıdakı konsulu Şerstin Agneta Valberq çıxış edərək layihə ilə bağlı müsbət fikirlərini bildirib. Şervin Nəcəfpurun “Atropatena” sərgisi 20 dəqiqə ərzində davam edib və qonaqlar tərəfindən alqışlarla qarşılanıb.
Gecənin davamında 2014-cü ildə ölkəmizi “Eurovision” mahnı müsabiqəsində təmsil edən Dilarə Kazımova musiqi proqramı ilə çıxış edib.
Qeyd edək ki, bu, bundan öncə Avropa ölkələri və yaxın Türkiyədə müxtəlif moda dəfilələrində iştirak edən 24 yaşlı Şervin Nəcəfpurun Azərbaycanda ilk moda gecəsi idi.
Gecədən təqdim etdiyimiz fotolar gənc fotoqraf Yusif Novruzzadə tərəfindən çəkilib.
Aytən Sadıqzadə
