Bloqer Oksana Samoylova keçmiş həyat yoldaşı, repçi Ciqana (əsl adı - Denis Ustimenko-Vaynşteyn) qarşı niyə polisə şikayət ərizəsi yazmadığının səbəbini açıqlayıb.
Oxu.Az xəbər verir ki, bu barədə "Baza" "Telegram" kanalı məlumat yayıb.
Məlumata əsasən, bloqer keçmiş ərindən çox qorxduğu üçün ondan şikayətçi olmaqdan imtina edib. Samoylovanın vəkili Marina Dubrovskaya isə məsələyə şərh vermək istəməyib.
"Baza"nın yaydığı informasiyaya görə, repçinin atəş açdığı ailə mühafizəçisi dindirmədə iştirak etməyib. Lakin müstəntiqlərdə həmin şəxsin hücum barədə danışdığı səs yazısı mövcuddur. Hüquq-mühafizə orqanları musiqiçini xuliqanlıq və qanunsuz azadlıqdan məhrumetmə maddələri üzrə yoxlayırlar.
Daha əvvəl bildirilmişdi ki, Ciqanın xidməti personala atəş açdığı Moskva vilayətindəki evi böyük məbləğdə aliment borcuna görə məhkəmə icraçıları tərəfindən həbs edilib.
Sentyabrın 23-də mətbuatda Ciqanın iyulun əvvəllərində Moskva ətrafındakı malikanəsində personalı girov götürməsi və mühafizəçilərdən birinə atəş açması barədə məlumatlar yayılıb. Hadisə baş verən zaman repçi və bloqerin dörd övladı - Ariela, Mayya, Leya və David evdə olublar. İfaçı cinayət məsuliyyətindən yaxa qurtarmağı bacarıb və İsraildəki reabilitasiya mərkəzinə yollanıb.
