Tanınmış teleaparıcı Xoşqədəm Hidayətqızı Saray qəsəbəsində qonşusunun evini sökdürür.
Oxu.Az xəbər verir ki, bu barədə AzNews.az-a Saray qəsəbəsi Mir Cəlal Paşayev küçəsinin sakini Xəqani Hüseynov məlumat verib.
X.Hüseynov deyib ki, əvvəllər qəsəbənin aşağı tərəfində torpaq sahəsi olub. Yer nəmişlik olduğuna görə oranı sataraq əməkdar artist Ədalət Şükürovun evinin yaxınlığında torpaq sahəsi alıb. Onun sözlərinə görə, elə hər şey də bundan sonra başlayıb:
“Ədalət Şükürov evini Xoşqədəm Hidayətqızına satandan sonra hər şey dəyişdi. Xoşqədəm xanım gəlib mənə dedi ki, yerini mənə sat, qohumlarımı yanıma gətirmək istəyirəm. Mən də etiraz etdim. Dedim sizə bir aparıcı kimi hörmətimiz var, amma yerimi satmıram. Bundan sonra tikintimizi sökməyə başladılar. İndi də bizim evin materiallarını maşınlara yığıb aparırlar. Halbuki evin damını bağlamağa iki daş qalmışdı”.
X.Hüseynov məsələ ilə bağlı Abşeron Rayon İcra Hakimiyyətinə də müraciət edib. Amma maraqlıdır ki, İcra Hakimiyyətindən vətəndaşa bununla bağlı məhz Xoşqədəm Hidayətqızına müraciət etməyi məsləhət biliblər:
“Xoşqədəm xanıma da zəng vururam, deyir ki, mənim səninlə danışmağa vaxtım yoxdur. Bu gün İcra Hakimiyyətinin tikinti şöbəsinin rəisi Seymur Məmmədovun qəbulunda olmuşam. Deyir ki, balamın canı üçün mənlik deyil, Xoşqədəmlikdir”.
Xoşqədəm Hidayətqızı ilə əlaqə saxlayaraq, iddianın təfərrüatlarını öyrənməyə çalışsaq da bu, mümkün olmayıb. Xoşqədəm Hidayətqızı Aznews.az-ın əməkdaşına çəkilişdə olduğunu deyib.
Abşeron Rayon İcra Hakimiyyətinin tikinti və memarlıq şöbəsinin müdiri Akif Əliyev deyib ki, söküntünün Xoşqədəm Hidayətqızı ilə bağlılığı yoxdur. Evin sökülməsinə səbəb tikinti normalarına riayət olunmamasıdır.
