Bahar Muradova: "Son illərdə qadınların təhsil və əmək bazarına çıxışı daha əlçatan olub"

"İdarəetmənin parlament, hökumət və məhkəmə hakimiyyəti ölçüsündə qadınlar daha parlaq və daha geniş spektrdə imkanlarını genişləndirməkdədirlər. Son 20 ildə qanunverici orqanda qadınların təmsilçiliyi artaraq 11,2%-dən 20,8%-ə çatıb".

Oxu.Az xəbər verir ki, bunu 2025 "Konstitusiya və Suverenlik" ili çərçivəsində keçirilən 8 Mart Beynəlxalq Qadınlar Gününə həsr edilmiş tədbirdə Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib.

O bildirib ki, dövlət qulluqçuları arasında 29,7%-lik iştiraka malik qadınlar, hakimlər korpusunda, hüquq-mühafizə orqanlarında və vəkillər arasında sıralarını daha da genişləndirməkdədirlər:

"Onların informasiya texnologiyaları və süni intellektə marağı daha da artıb, rəqəmsal iqtisadiyyatda geniş imkanlar əldə ediblər".

"Ölkəmizdə qadınların təhsil, sahibkarlıq və əmək bazarına çıxışı son illərdə daha əlçatan olub. Onlar dünyada sülh, təhlükəsizlik, rifah və inkişaf naminə mübarizəyə töhfələr verir, güclü, inklüziv cəmiyyət quruculuğunda, ictimai həyatda daha fəal iştirak edirlər", - deyə B. Muradova bildirib.

Aləmdə Nəsib