"Biz gələcəyə zombi kimi gedə bilmərik": COP29-da balinalar və dənizlər necə xilas edilir?

"ABŞ və Cənub-Şərqi Asiya ölkələrindən olan QHT nümayəndələri dünyanın aparıcı forumunda - Bakıda keçirilən COP29 iqlim konfransında meşələrin, torpaqların və dənizlərin mühafizəsinin əsas yollarını müzakirə ediblər".

Oxu.Az xəbər verir ki, bu sözlər Rusiyanın "NEWS.ru" nəşrində dərc olunan məqalədə yazılıb.

Ekspertlər belə qənaətə gəliblər ki, dünya ölkələrində ekoloji problemlərin həlli üçün yaşıl təşəbbüslər, qanunlar və siyasi iradə üçün pul çatışmır. Nəticədə dənizlər, torpaqlar və planetin ən böyük heyvanları - balinalar əziyyət çəkir.

COP29-un ekoloji həllər üçün resursların səfərbər edilməsi üzrə xüsusi sessiyasında "New Day Impact" layihəsinin moderatoru və baş direktoru Duqlas Heske dünyada davam edən müharibələrdən narahatlığını ifadə edib.

"Biz zombilər kimi gələcəyə gedə bilmərik", - o bildirib.

"Save the Soil" təşkilatından Culi Yankovski qeyd edib ki, hər kəs torpaq və qida arasındakı əlaqəni başa düşməlidir.

O vurğulayıb ki, torpağın qorunması üçün təcili tədbirlər görülməlidir.

Banqladeşli Qolam Rabbani COP29-da ölkəsinin daşqın, yerdəyişmə və məhsul itkisi ilə mübarizəsindən danışıb. Bundan əlavə, iqlim dəyişikliyi ilə bağlı xəstəliklərin sayı artır. Rabbani Banqladeşdə denge qızdırmasının yayıldığını vurğulayıb.

Cənub-Şərqi Asiya İqlim Fəaliyyəti Şəbəkəsinin nümayəndəsi Ruçi Çaudhari COP29-da ətraf mühiti qorumaq üçün qanunların qəbul edilməsinin lazım olduğunu söyləyib.

"Sea and Coast" təşkilatının prezidenti Karter Henn təmiz su uğrunda mübarizədən nümunələr verib. O, xüsusən də çöküntünün süzülməsi və stabilləşdirilməsi layihəsi haqqında danışıb.

Balinaların xilas edilməsi mərkəzindən Duqlas Heske bildirib ki, onun təşkilatı balinaların qidalandığı plankton xərçəngkimilər olan krilin həddindən artıq məhv olmasının qarşısını almaq üçün Cənubi Okeanda (Sakit, Atlantik və Hind okeanlarının Antarktidanı əhatə edən hissələri) qorunan ərazilər yaratmağı planlaşdırır.