Azərbaycanın işğaldan azad edilən Cəbrayıl rayonu ərazisində Türkiyə-Azərbaycan Beynəlxalq Meşə Təlim və Tinglik Mərkəzi Kompleksi fəaliyyətə başlayıb.
Oxu.Az "Anadolu Ajansı"na istinadən xəbər verir ki, bu mühüm layihə artıq istifadəyə verilib.
Türkiyə Cümhuriyyətinin Kənd Təsərrüfatı və Meşə Nazirliyinin tabeliyindəki Meşə Təsərrüfatı Baş İdarəsinin köməkliyi əsasında ərsəyə gələn bu müəssisənin təməlqoyma mərasimi 20 oktyabr 2022-ci ildə Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın iştirakı ilə reallaşıb.
Bütövlükdə 11.4 hektarlıq sahəni əhatə edən bu kompleksin 12 min 200 kvadratmetrlik hissəsində müxtəlif binalar və infrastruktur inşa edilib. Həmin obyektlər sırasına əsas təlim binası, inzibati mərkəz, istehsal emalatxanası, həmçinin yetişdirilən tinglərin satışı üçün nəzərdə tutulan xüsusi sahə aiddir. Bilavasitə tinglərin yetişdirilməsi məqsədilə 47 min 300 kvadratmetrlik xüsusi zona ayrılıb.
Fəaliyyətə başlayan müəssisə il ərzində 2 milyon ədəd ting istehsal etmək potensialına malikdir. Qurumda illik olaraq 400 şəxs üçün həm nəzəri, həm də təcrübi meşəçilik dərslərinin təşkili planlaşdırılır.
Bundan əlavə, tədris prosesi zamanı iştirakçıların mərkəzin özündə gecələməsi üçün də müvafiq şərait yaradılıb.
Xatırladaq ki, noyabrın 8-də ölkəmizdə səfərdə olan Türkiyə lideri Rəcəb Tayyib Ərdoğan Azərbaycan dövlət başçısı İlham Əliyevlə birgə mətbuat konfransı zamanı bu layihəni iki dövlət arasındakı tərəfdaşlığın müasir göstəricisi adlandırmışdı. Eyni zamanda, o, Qarabağ regionunun bərpası və tərəqqisi yolunda Azərbaycana bütün lazımi yardımları etməyə hər zaman hazır olduqlarını diqqətə çatdırıb.
