"Azərbaycan Mərkəzi Asiya ölkələrinin məsləhətləşmə görüşləri formatına tamhüquqlu iştirakçı kimi qoşulub. Dövlət başçımızın qeyd etdiyi kimi, Mərkəzi Asiya və Azərbaycan bu gün dünyada əhəmiyyəti davamlı olaraq artan vahid geosiyasi və geoiqtisadi regiondur".
Bu fikirləri Oxu.Az-a açıqlamasında Milli Məclisin deputatı Pərvanə Vəliyeva deyib.
"Bu "altılıq" logistika baxımından vahid mərkəzdir. Hazırkı münasibətlərin dinamikası gələcəkdə bu əlaqələrin daha da güclənəcəyini göstərir. Sözügedən məsələ inteqrasiya ilə yanaşı, regional təhlükəsizlik, ticarət və energetika sahələrində də geniş imkanlar açır. Azərbaycan Şərq-Qərb və Şimal-Cənub nəqliyyat dəhlizlərinin fəal iştirakçısıdır. Ölkəmiz Türkiyə ilə Mərkəzi Asiya arasında coğrafi, iqtisadi, nəqliyyat və digər sahələrdə körpü rolunu oynayır. Son illərdə Mərkəzi Asiya ölkələri ilə Türkiyəni Azərbaycan üzərindən bağlayan Şərq-Qərb nəqliyyat dəhlizinin ötürmə qabiliyyətinin artırılması üçün Azərbaycan sərmayələrini yüksəldir. Bu məqsədlə Orta Dəhlizin rəqəmsallaşdırılması və ticarətin asanlaşdırılması istiqamətində bir sıra layihələr icra olunur. Bu layihələr logistika səmərəliliyini artıracaq və xərclərin azalmasına təsir göstərəcək. 2022-ci ildən bəri Orta Dəhlizlə yükdaşımalar təqribən 90 faiz artıb" - deyə, o bildirib.
Millət vəkili qeyd edib ki, dəhliz boyu tranzit müddətləri əhəmiyyətli dərəcədə azalıb:
"Xəzərin ən böyük ticarət donanması - Ələt Beynəlxalq Ticarət Limanı, Bakı-Tbilisi-Qars dəmir yolu, 9 beynəlxalq hava limanı, regionun ən böyük yükdaşıma aviaşirkəti və digər amillər Azərbaycanı beynəlxalq nəqliyyat mərkəzlərindən birinə çevirib. Mərkəzi Asiya + Azərbaycan və Avropa marşrutu alternativ, sabit və təhlükəsiz ticarət yoluna çevrilir. Bu istiqamətdə yükdaşımalar artıb, iqtisadi, humanitar, mədəni əlaqələr sürətlə inkişaf edir. Zəngəzur dəhlizi həm Orta Dəhliz, həm də Şimal-Cənub Dəhlizi çərçivəsində yeni nəqliyyat arteriyası və ikinci marşrut kimi mühüm əhəmiyyət kəsb edir. Sülh, regional bağlantılar və iqtisadi inkişafla əlaqəli digər mühüm istiqamət enerji təhlükəsizliyidir. Ölkəmiz bu məqsədlərin qlobal səviyyədə təmin edilməsində fəal rol oynayır. Azərbaycan bir çox ölkələrin enerji təhlükəsizliyinin təmin edilməsində etibarlı və əvəzolunmaz tərəfdaş kimi tanınır".
Onun sözlərinə görə, şaxələndirilmiş neft və qaz kəmərləri vasitəsilə Xəzər regionunun beynəlxalq bazarlara birləşdirilməsində Azərbaycan strateji rol oynayır:
"Hazırda biz 14 ölkəyə təbii qaz ixrac edirik. Coğrafi əhatəsinə görə boru kəmərləri ilə təbii qaz ixrac edən ölkələr arasında Azərbaycan birinci yerdədir".
P.Vəliyeva əlavə edib ki, Özbəkistan, Qazaxıstan, Qırğızıstan, Türkmənistan və Macarıstanın dövlət və hökumət başçılarının Azərbaycanın azad olunmuş ərazilərində qardaşlıq hədiyyəsi olaraq məktəb, məscid və yaradıcılıq mərkəzinin tikilməsi, eləcə də gələcəkdə məktəblərin inşası qardaş Türk dövlətlərinin Azərbaycana olan dərin hörmət və yüksək etimadının göstəricisidir: "Azərbaycan uğurlu regional siyasətin nəticəsində və yeni reallıqda Mərkəzi Asiya regionuna elə dərin inteqrasiya edib ki, artıq yeni geosiyasi quruluş - C6-ya (Central Asia 6) çevrilib".
Məhərrəm Əliyev
