Pakistanın ən nüfuzlu universitetlərindən biri olan Müasir Dillər Universitetində (NUML) fəaliyyət göstərən Azərbaycan Dil və Mədəniyyət Mərkəzinin yenidən qurulmasından sonra açılışı olub.
Oxu.Az xəbər verir ki, bu münasibətlə təşkil olunmuş tədbirdə Azərbaycanın Pakistandakı səfiri Xəzər Fərhadov, Pakistan MDU-nun rektoru Şahid Mahmud Kayani, ali təhsil müəssisəsinin prorektorları, müəllim və tələbə heyəti, bu ölkədə fəaliyyət göstərən beyin mərkəzlərinin nümayəndələri, eləcə də səfirlik əməkdaşları iştirak ediblər.
Tədbirin əvvəlində Azərbaycan və Pakistan himnləri səsləndirilib.
Sonra Şahid Mahmud Kayaninin çıxışı dinlənilib. Rektor Azərbaycan və Pakistanın iki dost və qardaş ölkə olduqlarını ifadə edib. O, Azərbaycan Dillər Universitetində Pakistan Mədəniyyət Mərkəzinin, NUML-da isə Azərbaycan Dil və Mədəniyyət Mərkəzinin fəaliyyət göstərməsinin iki ölkə arasında mövcud çoxşaxəli əlaqələrin möhkəmlənməsində müstəsna rol oynadığını deyib. Rektor pakistanlı və o cümlədən dünyanın müxtəlif ölkələrdən olan tələbələrin mərkəzə xüsusi diqqət göstərdiyini bildirib.
NUML rəhbəri həmçinin, universitet tərəfindən həyata keçirilən renovasiya tədbirləri nəticəsində həmin mərkəzin yenidən qurularaq fəaliyyətə hazır formaya gətirildiyini qeyd edərək, bu gün onun yenilənmiş formada fəaliyyətə başlamasının təhsilin, elmin və insanlar arasında əlaqələrimizin inkişafına böyük töhfə verəcəyini ifadə edib.
Daha sonra ADU-nun rektoru, akademik Kamal Abdulla tərəfindən ünvanlanmış video-müraciət dinlənilib. O, nitqində möhkəm təməllər üzərində qurulmuş və dərin tarixi köklərə malik Azərbaycan-Pakistan münasibətlərində təhsil sahəsində əməkdaşlığımızın əhəmiyyətindən danışıb.
K.Abdulla bu əməkdaşlığın inkişaf etdirilməsi istiqamətində hər iki ölkə rəhbərləri tərəfindən qarşıya qoyulmuş missiyanın vacibliyini vurğulayaraq, bu istiqamətdə ortaq elmi tədqiqat işlərinin aparılmasının önəminə toxunub.
Yekunda ADU-nun rektoru NUML-da Azərbaycan Dil və Mədəniyyət Mərkəzinin fəaliyyətinin davam etdirilməsi yönündə pakistanlı həmkarı, habelə ölkəmizin Pakistandakı səfirliyi tərəfindən tərəfindən göstərilən böyük dəstəyə görə öz təşəkkürlərini izhar edib.
Daha sonra Azərbaycanın Pakistandakı səfiri Xəzər Fərhadov çıxış edib.
Səfir Azərbaycan-Pakistan münasibətlərinin dinamik inkişafından söhbət açaraq, ötən dövrlər ərzində bu istiqamətdə görülmüş işlərdən bəhs edib. Diplomat Pakistanın iki böyük şəhərindən - Lahor və İslamabaddan paytaxt Bakıya birbaşa uçuşların sayının həftə ərzində səkkizə yüksəldiyini, Hökumətlərarası Birgə Komissiyanın fəaliyyəti, bu Komissiyanın tərkibində yaradılmış işçi qrupları barədə məlumatları diqqətə çatdırıb.
Səfir Xəzər Fərhadov 2022-ci ilin iyun ayından etibarən fəaliyyət göstərən və hazırda əsaslı yenidənqurma işlərindən sonra inaqurasiyası keçirilən Azərbaycan Dil və Mədəniyyət Mərkəzinin elm, təhsil, mədəni və humanitar sahələr üzrə iki dost və qardaş ölkələrimiz arasındakı münasibətlərin daha da dərinləşdirilməsində önəmli rol oynadığını diqqətə çatdırıb. Mərkəzin fəaliyyəti ilə bağlı göstərilən dəstəyə görə NUML-ın rəhbərliyini təşəkkür edib.
