"Bəşəriyyətin hazırkı mərhələsində yeni toqquşmaların və qarşıdurmaların şahidi oluruq. Təəssüf ki, Samuel Hantinqtonun "Sivilizasiyaların toqquşması" ilə bağlı irəli sürdüyü proqnoz müxtəlif formalarda və təzahürlərdə qlobal miqyasda özünü göstərir".
Oxu.Az xəbər verir ki, Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev "Bakı Mədəniyyət və Media Dialoqu Platforması" çərçivəsində keçirilən "Sülhün dili və dezinformasiyaya qarşı mübarizə" mövzusunda xüsusi sessiyada deyib.
Onun sözlərinə görə, bəşəriyyət olaraq bu nəzəriyyəyə inanmaq istəmirdik:
"Lakin təəssüf ki, onun müəyyən təzahürlərinin baş verdiyini görürük. Məhz buna görə də belə mədəniyyətlərarası və sivilizasiyalararası dialoqa hər zamankından daha çox ehtiyac var. Bununla belə, yalnız sivilizasiyalar arasında deyil, eyni zamanda, hər bir sivilizasiyanın daxilində də dialoqun aparılması vacibdir.
Bu baxımdan hesab edirəm ki, Mədəniyyətlərarası Dialoq Forumu müxtəlif müzakirələrin davam etdirilməsi üçün daha bir platforma rolunu oynayacaq. Dünyanın müxtəlif bölgələrindən nümayəndələr, eləcə də ATƏT, ICESCO, UNESCO və digər beynəlxalq təşkilatların təmsilçiləri bu prosesə dəstək vermək üçün bir araya gəlirlər. Bu platformanın daha bir üstünlüyü onun Azərbaycanda keçirilməsidir. Azərbaycan Avropa ilə Asiyanın kəsişməsində yerləşən, müxtəlif mədəniyyətlərin və sivilizasiyaların qovuşduğu məkandır. Bir tərəfdən Avropa institutlarının üzvüyük, digər tərəfdən isə daha geniş İslam sivilizasiyasının bir hissəsiyik".
