Fon der Lyayenin Bakı səfəri: tərəfdaşlıq və enerji əməkdaşlığı

Avropa Komissiyasının prezidenti Ursula fon der Lyayenin Bakı səfəri regionun geosiyasi və iqtisadi mənzərəsində mühüm hadisə kimi yadda qalıb. Azərbaycan Respublikasının Prezidenti İlham Əliyev ilə keçirilən geniştərkibli görüşlər və mətbuata bəyanatlar Bakı ilə Brüssel arasında strateji tərəfdaşlığın yüksək dinamikasını bir daha nümayiş etdirib. Səfər çərçivəsində tərəflər enerji təhlükəsizliyi, regional sabitlik və müfəssəl əməkdaşlıq sazişi üzrə işlərin gedişatını geniş müzakirə ediblər.

Dövlət başçısı İlham Əliyev öz bəyanatında energetika sahəsindəki əlaqələrin əhəmiyyətini xüsusi vurğulayıb. Qeyd olunub ki, enerji təhlükəsizliyi hər bir ölkə üçün milli maraq məsələsidir və bu gün Azərbaycanın qaz ixracının tam yarısı məhz Avropa İttifaqına üzv dövlətlərin payına düşür. Eyni zamanda, ölkə ərazisindən keçən yük həcmlərinin artması Azərbaycanın logistik qovşaq kimi regional rolunu gücləndirir. Azərbaycan Avropa İttifaqı üçün Cənubi Qafqazda ən əsas ticarət tərəfdaşı olmaqda davam edir.

Ursula fon der Lyayen, öz növbəsində, Azərbaycanın Avropa üçün etibarlı tərəfdaş olduğunu və regional inkişafı irəli apara biləcək nadir ölkələrdən biri hesab edildiyini bildirib. O, ölkəmizin təkcə ənənəvi karbohidrogen resursları deyil, həm də təmiz yaşıl enerji üçün mühüm regional mərkəzə çevrilmək potensialını yüksək qiymətləndirib. Avropa Komissiyasının rəhbəri, həmçinin regional sülhün kağız üzərində deyil, real həyatda tətbiqinin dəstəklənməsinə hazır olduqlarını ifadə edərək sülh prosesindəki irəliləyişlərlə bağlı təbriklərini çatdırıb. Səfər tərəflər arasında imzalanacaq yeni müfəssəl sazişə güclü təkan verib.