Səhibə Qafarova: elmi fəaliyyəti, siyasi karyerası və spiker vəzifəsi

Səhibə Əli qızı Qafarova 1955-ci il martın 19-da Şəmkir şəhərində anadan olub. Azərbaycan Rus Dili və Ədəbiyyatı Pedaqoji İnstitutunun rus dili və ədəbiyyatı fakültəsini, həmçinin Azərbaycan Dillər Universitetinin ingilis filologiyası fakültəsini fərqlənmə ilə bitirib. Filologiya elmləri doktoru, professor. Əməkdar müəllim. Bir neçə dərslik, dərs vəsaiti, monoqrafiya və elmi məqalələrin müəllifidir. İngilis və rus dillərini bilir.

Peşəkar və akademik fəaliyyəti

1978–1981-ci illər — Şəmkir şəhərinin orta məktəblərində müəllim işləyib.
1981–2000-ci illər — Azərbaycan Rus Dili və Ədəbiyyatı Pedaqoji İnstitutunda laborant, müəllim, baş müəllim, dosent, professor; Qərb Universitetinin Qərb dilləri fakültəsinin dekanı.
2000–2020-ci illər — Bakı Slavyan Universitetinin ədəbiyyat nəzəriyyəsi kafedrasının professoru, Avropa dilləri kafedrasının müdiri, beynəlxalq əlaqələr üzrə prorektor (2010–2020-ci illərdə ictimai əsaslarla).
2006-cı il — ABŞ Dövlət Departamentinin Fulbright Scholarship proqramı çərçivəsində Miçiqan Universitetinin Gender Tədqiqatları İnstitutunda çalışıb.

Siyasi fəaliyyəti

"Yeni Azərbaycan" Partiyasının üzvüdür.
Azərbaycan Respublikası Milli Məclisinin dördüncü və beşinci çağırış deputatı olub.
2020-ci il martın 10-dan Azərbaycan Respublikası Milli Məclisinin Sədridir.

Beynəlxalq fəaliyyəti

2012–2014-cü illər — Avropa Şurası Parlament Assambleyasının (AŞPA) irqçilik və ksenofobiyaya qarşı mübarizə üzrə yarımkomitəsinə rəhbərlik edib.
2014–2015-ci illər — AŞPA-nın gender bərabərliyi üzrə yarımkomitəsinə rəhbərlik edib.
2015–2017-ci illər — "Zorakılıqdan azad qadınlar" şəbəkəsinin siyasi koordinatoru, qadınlara qarşı zorakılığa qarşı mübarizə məsələləri üzrə baş məruzəçi olub.
2016–2018-ci illər — AŞPA-nın Miqrasiya, qaçqınlar və məcburi köçkünlər üzrə komitəsinin sədri, Büro üzvü olub.
2018–2020-ci illər — Azərbaycanın Avronest Parlament Assambleyasındakı nümayəndə heyətinin rəhbəri olub.
Hazırda Azərbaycanın Türkdilli Dövlətlərin Parlament Assambleyasında (TürkPA) və MDB-nin Parlamentlərarası Assambleyasında nümayəndə heyətlərinin rəhbəridir.

Şəxsi həyatı: Ailəlidir, iki övladı var.