ABŞ Hərbi Dəniz Qüvvələri məxfi avadanlıqdan istifadə edərək, dalmasından bir neçə saat sonra “Titan” sualtı qurğusunun gövdəsinin dağılma səsini qeydə alıb.
Bu barədə ABŞ Hərbi Dəniz Qüvvələrinin yüksək rütbəli nümayəndəsi məlumat verib.
Bildirilir ki, ABŞ hərbçiləri cihazla əlaqənin kəsilməsindən xəbər tutandan dərhal sonra düşmən sualtı qayıqlarını aşkar etmək üçün nəzərdə tutulmuş gizli sonar sistemindən istifadə edərək onu axtarmağa başlayıblar. Bu sistemin adı ABŞ-nin milli təhlükəsizlik səbəbi ilə açıqlanmır. İşə başlayandan qısa müddət sonra sistem (sonradan batiskafın qalıqlarının tapıldığı yerin yaxınlığında) partlayış səsini qeydə alıb. Həmin an hərbçilər qeydə alınan səsin nədən qaynaqlandığını dəqiq deyə bilməyiblər.
Cümə axşamı ABŞ Sahil Mühafizəsi təsdiqləyib ki, əvvəllər axtarış əməliyyatı aparılan yerdə aşkar edilmiş qalıqlar Atlantik okeanının sularında yoxa çıxan “Titan”a aiddir. Onların təhlili göstərdi ki, dərin dəniz aparatının bütün sərnişinləri həlak olublar. Mütəxəssislərin ilkin versiyasına görə, qurğu partlama nəticəsində dağılıb, yəni suyun təzyiqinin təsiri altında əzilib.
Xatırladaq ki, turistləri “Titanik” sərnişin laynerinin batdığı yerə aparmaq üçün istifadə edilən “Titan” sualtı eniş aparatı iyunun 18-də, dalma başlayandan təxminən 1 saat 45 dəqiqə sonra Atlantik okeanında itib. İyunun 20-də “OceanGate Expeditions” şirkəti batiskafın yoxa çıxdığını təsdiqləyib. Sualtı aparatda şirkətin qurucusu Stokton Raş, fransız dərin dəniz veteranı Pol-Anri Narjeole, biznes aviasiyası ilə məşğul olan britaniyalı milyarder Hemiş Hardinq, pakistanlı biznesmen Şahzadə Davud və oğlu Süleyman olub.
Qeyd edək ki, “OceanGate” şirkətinin sahibi və “Titan” batiskafını idarə edən Stokton Raş ilə 1912-ci ildə batan “Titanik”də həlak olan iki sərnişin arasında qohumluq əlaqələri üzə çıxıb.
Mənbə: The Wall Street Journal
