Katalin Novak: "Əhali artımı olmadan dayanıqlı inkişaf mümkün deyil"

"Son illərdə dünyada doğuşların sayı 10 faiz azalıb və bu tendensiyanın nəticələri yalnız gələcək onilliklərdə daha açıq şəkildə hiss olunacaq".

Oxu.Az xəbər verir ki, bunu "Dünya düzəninin yenidən düşünülməsi: Çağırışların fürsətlərə çevrilməsi" adlı XII Qlobal Bakı Forumunda Macarıstanın sabiq Prezidenti Katalin Novak deyib.

O, demoqrafik problemlərin uzunmüddətli təsirləri barədə xəbərdarlıq edərək, dövlətlərin əhali artımı məsələsinə fərqli yanaşmalar sərgilədiyini qeyd edib.

"Dayanıqlı inkişaf yalnız sabit və sağlam demoqrafik dinamika ilə mümkündür. Əgər gələcək nəsillər olmayacaqsa, onda ekoloji problemlərin həlli üçün narahatlıq keçirməyin də mənası qalmır. Cəmiyyətlər gənclərin ailə planlamasını düzgün şəkildə həyata keçirməsi üçün dəstək verməlidir. Eyni zamanda, əmək fəaliyyəti onların ailə qurmasına mane olmamalıdır", - deyə sabiq prezident vurğulayıb.

O həmçinin ailə institutunun gücləndirilməsinin cəmiyyətin davamlı inkişafı üçün əsas şərt olduğunu qeyd edib və gənclərin sosial rifahının artırılmasının vacibliyini diqqətə çatdırıb.

Qeyd edək ki, XII Qlobal Bakı Forumu dünyanın nüfuzlu siyasətçiləri, ekspertləri və akademiklərinin iştirak etdiyi beynəlxalq platformadır. Forum çərçivəsində müxtəlif sahələrdə qlobal çağırışlar və onların həlli yolları müzakirə edilir.

Aləmdə Nəsib