Yoram Veys: "Elmi mühit yeni pandemiyaların qarşısını almaq üçün çalışır"

"Elmi araşdırmalar yeni pandemiyaların qarşısını almaq üçün böyük rol oynayır və bu sahədə görülən işlər intensivləşdirilməlidir".

Oxu.Az xəbər verir ki, bunu XII Qlobal Bakı Forumu çərçivəsində "Qlobal sağlamlıq böhranla üz-üzə: Hazırlıq və bərabərlikdə yeni sərhədlər" adlı panel müzakirədə Hadassah Tibb Təşkilatının baş direktoru Yoram Veys deyib.

"Biz elmi mühitə diqqət yetirməliyik. Elm də yeni pandemiyaların baş verməməsi üçün çalışır, lakin bu istiqamətdə bəzi problemlər mövcuddur. Xüsusilə antibiotiklərin istifadəsində ciddi problemlər görürük. Onların nəzarətsiz tətbiqi gələcəkdə daha böyük səhiyyə böhranlarına yol aça bilər", - deyə o, fikrini davam etdirib.

Veys pandemiya dövründə səhiyyə sistemlərinin kommunikasiya sahəsində çətinliklərlə üzləşdiyini və bu məsələdə daha operativ yanaşmanın vacibliyini vurğulayıb:

"Xəstəxanaların öhdəliyi yalnız pasiyentlərin müalicəsi ilə məhdudlaşmır, səhiyyə sahəsində baş verənləri icmalara çatdırmaq da onların vəzifəsidir, lakin biz COVID pandemiyası zamanı gördük ki, hətta inkişaf etmiş ölkələr belə bu məsələdə gecikirdilər. Əgər dünyada yeni pandemiya və ya hər hansı xəstəliyin sürətli yayılması müşahidə olunursa, ilk addım olaraq işçi qrup yaradılmalı, məlumatlar müxtəlif dillərə tərcümə edilməli və ictimaiyyətə tez bir zamanda çatdırılmalıdır".

O, həmçinin səhiyyədə rəqəmsal texnologiyaların rolunun artdığını və bunun gələcəkdə səhiyyə xidmətlərinin əlçatanlığını daha da yüksəldəcəyini qeyd edib:

"Məsafədən həkim məsləhəti və müalicə də mümkündür. Bu, xüsusilə ucqar bölgələrdə yaşayan insanlar üçün böyük üstünlükdür. Səhiyyədə rəqəmsal texnologiyaların inkişafı müalicə prosesini daha səmərəli və sürətli edəcək".

Aləmdə Nəsib