Misir və ABŞ-dən olan beynəlxalq arxeoloqlar qrupu Nilin qərb sahilində yerləşən qədim Abidos şəhərində heyrətamiz bir kəşf edib. Alimlər yerin yeddi metrdən çox dərinliyində naməlum firona məxsus məzar aşkarlayıblar.
Oxu.Az-ın "The New York Times"a istinadla verdiyi məlumata görə, ilkin təhlil dəfn yerinin yaşının təxminən 3600 il olduğunu göstərir.
Bildirilir ki, dəfn kompleksi rəsmlər və barelyeflərlə bəzədilmiş bir neçə otaqdan ibarətdir. Tağlı tavanların hündürlüyü təxminən beş metrə çatır. Təxminən 1700 il əvvəl baş vermiş qarətə baxmayaraq, dekorun bir çox elementləri yaxşı qorunub saxlanılıb. Məzarın girişində İsida və Neftida ilahələrinin təsvirləri görünür.
"İtmiş" sülalə
Əvvəllər məlum olmayan kral sülaləsinin mövcudluğunu sübut edən Abidosdakı ilk firon məzarı hələ 2014-cü ildə tapılmışdı. Bu, Kral Seneb-Keyə məxsus idi. İki məzarın memarlığı və rəsmlərinin oxşarlığı son zamanlarda aşkar edilən dəfn yerinin eyni dövrə aid olduğunu və bəlkə də orada sirli Abidos sülaləsinin ilk nümayəndələrindən birinin dəfn edildiyini ehtimal etməyə imkan verir.
"Bu, Qədim Misir tarixinin araşdırılmasında tamamilə yeni bir fəsildir. Biz çox həyəcanlıyıq", - deyə qazıntıların ABŞ tərəfindən rəhbəri Cozef Veqner təəssüratlarını bölüşüb.
Onun sözlərinə görə, Abidosdakı məzarlar qorunmuş bədii tərtibatı olan ən erkən kral məzarlarından biridir.
Firon şəxsiyyətinin sirri
Təəssüf ki, zaman dəfn yerini qorumayıb. Arxeoloqlar qazıntı yerində tanına bilən insan qalıqları aşkar etməyiblər. Hökmdarın adı olan papirus zolaqlarındakı yazılar da ciddi şəkildə zədələnib və oxunmur.
Alimlər məzarın kimə məxsus ola biləcəyi barədə iki əsas versiya irəli sürürlər. Ən ehtimal olunan namizədlər Kral Senayib və ya Firon Pentcenidir ki, onların şərəfinə Abidosda abidələr ucaldılıb. Lakin bu fərziyyələri təsdiqləmək üçün əlavə tədqiqatlar tələb olunur.
