Türkiyə Respublikasının Ədliyyə naziri Yılmaz Tunç Uludağda baş verən və iki nəfərin həyatını itirdiyi yanğınla bağlı açıqlama verib.
Oxu.Az bu barədə "Anadolu" agentliyinə istinadla xəbər verib.
Nazirin sözlərinə görə, yanğınla əlaqədar Bursa Respublika Baş Prokurorluğunun məhkəmə istintaqı başladıb, yanğının başvermə səbəbi və məsuliyyət daşıyanların müəyyən edilməsi üçün işlər aparılır.
"İstintaq çərçivəsində hoteli idarə edən şirkətin müdiri saxlanılıb", - deyə o vurğulayıb.
Qeyd edək ki, yanğında xəsarət alan Türkiyə Xizək və Snoubord Müəllimləri Dərnəyinin sədri Yahya Usta, həyat yoldaşı Fikriye və oğlu -24-cü Pekin Qış Olimpiya Oyunlarında Türkiyəni təmsil edən milli xizəkçi Berkin Usta Uludağdakı tibb mərkəzinə çatdırılıb. Yahya Usta və Berkin Ustanı göstərilən tibbi yardıma baxmayaraq xilas etmək mümkün olmayıb.
Uludağdakı hoteldə baş verən yanğında ölənlərin sayı artıb.
Oxu.Az-ın verdiyi məlumata görə, bu barədə Bursa valiliyi xəbər yayıb.
"Uludağ Hotellər Bölgəsində yerləşən və 02.01.2025 tarixində lisenziyası ləğv edilən, müştərisi olmayan hoteldə bu gün yanğın baş verdiyi barədə məlumat daxil olub. Yanğına müxtəlif dövlət qurumlarından 110 nəfərlik heyət cəlb edilib və yanğın dərhal nəzarət altına alınaraq söndürmə işlərinə başlanılıb. Hoteldə olan 12 işçi təxliyə edilib. Təxliyə edilənlərdən iki nəfər təəssüf ki, həyatını itirib".
Qeyd olunur ki, daha üç nəfər tüstüdən zəhərlənərək xəstəxanaya yerləşdirilib. Onların şüurunun qapalı olduğu və müalicələrinin davam etdiyi bildirilib.
İddialara görə, hoteldəki xizək müəllimləri verandada manqal qalayarkən, üst örtük alovlanıb və yanğın qısa zamanda böyüyüb. Əşyalarını götürmək üçün yenidən hotelə girən şəxslər içəridə qalıblar. Ölənlərdən birinin 24-cü Pekin Qış Olimpiya Oyunlarında Türkiyəni təmsil edən milli xizəkçi Berkin Usta olduğu vurğulanır, digəri isə hotelin xizək avadanlıqları otağında çalışan şəxs olub.
Bursanın Uludağ bölgəsində yerləşən hoteldə yanğın baş verib, alov qısa müddətdə bütün binanı bürüyüb. Faciə nəticəsində bir nəfər həlak olub.
Oxu.Az "Hürriyet"ə istinadla xəbər verir ki, bu barədə Bursa Böyükşəhər Bələdiyyəsinin başçısı Mustafa Bozbey məlumat verib.
Onun sözlərinə görə, yanğınsöndürənlər dörd nəfəri xilas ediblər.
Hoteldə onlardan başqa heç kimin olmadığı düşünülür.
Yanğının səbəbi hələ müəyyən olunmayıb.
Qeyd olunur ki, hotel 78 nəfərin həlak olduğu Kartalkaya faciəsindən sonra bağlanmışdı.
