İnsanlar Ayda ölümcül patogenləri yaya bilərlər - Alimlərdən XƏBƏRDARLIQ

ABŞ və Kanadadan olan beynəlxalq alimlər qrupu narahatedici bir faktı açıqlayıblar: Ayın qütblərindəki daimi kölgəli ərazilər Yer mikroblarını onilliklərlə qoruma qadirdirlər. Bu patogenlər gələcək Ay missiyalarının iştirakçıları üçün təhlükəli ola bilər.

Oxu.Az-ın verdiyi məlumata görə, bu barədə ABŞ-nin Universitet Kosmik Tədqiqatlar Assosiasiyası (USRA) tərəfindən təşkil edilən Ay və Planetlər Elmi Konfransında məruzə edilib.

York və Merilend Universitetlərindən olan mütəxəssislər "Artemis" missiyasının eniş üçün əsas hədəfləri olan Şeklton və Faustini kraterlərindəki şəraiti modelləşdiriblər. Məlum olub ki, əbədi qaranlıq və -250°C-yə qədər soyuq, həmçinin ultrabənövşəyi şüalanmanın olmaması mikroorqanizmlərin qorunması üçün ideal şərait yaradır.

Bakteriya sporları 50 ilə qədər həyat qabiliyyətini saxlaya, üzvi molekullar isə bu cür təbii "soyuducularda" milyonlarla il qala bilər.

Komandanın fikrincə, insanlar demək olar ki, qaçılmaz olaraq daimi kölgəli ərazilərə mikroblar aparacaqlar, çünki skafandrlar hər kvadrat santimetrdə 1 milyona qədər bakteriya saxlayır, kəşfiyyatçı robotlar hətta dezinfeksiyadan sonra steril ola bilməz. Beləliklə, buzun üzvi maddələr üçün analizi yanlış nəticələr verəcək.

"Daimi kölgəli zonalar Ay arxivləridir. Əgər biz onları çirkləndirsək, Günəş sistemini anlamaq üçün "açarları" itirəcəyik", - deyə müəlliflər xəbərdarlıq ediblər.