Daxili İşlər Nazirliyinin (DİN) Kibercinayətkarlıqla Mübarizə Baş İdarəsi (KMBİ) "Any Unboxing" dələduzluq piramidasına qarşı uğurlu əməliyyat keçirib.
Oxu.Az xəbər verir ki, bu barədə DİN məlumat yayıb.
Bildirilib ki, son aylarda virtual məkanda "Ponzi" sxemi əsasında fəaliyyət göstərən "Any Unboxing" adlı onlayn maliyyə piramidası vasitəsilə vətəndaşların pul vəsaitlərinin ələ keçirilməsi ilə bağlı çoxsaylı müraciətlər daxil olub.
Araşdırmalarla müəyyən edilib ki, piramidanı təşkil və idarə edən şəxslər onlayn qruplar vasitəsilə vətəndaşları sxemə cəlb ediblər. İştirakçılara müxtəlif məbləğlər müqabilində "virtual qutular" satılıb və onları hər gün açmaqla yüksək gəlir əldə edəcəkləri vəd olunub. Vətəndaşların qazandıqları "gəlirlər" tətbiqdəki profil hesablarında əks olunsa da, reallıqda onların heç bir iqtisadi əsası olmadığından nağdlaşdırılması mümkün olmayıb. Həmçinin platformaya yeni üzvlər cəlb edən şəxslərə bonuslar veriləcəyi vəd edilib. Bu yolla 300-dən artıq vətəndaş piramidaya cəlb edilib və onlara müxtəlif məbləğlərdə maddi ziyan vurulub.
Həyata keçirilən əməliyyat-texniki tədbirlərlə piramidanın ölkə ərazisində Malayziya vətəndaşları - 38 yaşlı Li Kay Fatt və 34 yaşlı Ravi Sivadass tərəfindən təşkil edildiyi müəyyən olunub. Qanunsuz fəaliyyətin genişləndirilməsi və yeni iştirakçıların cəlb olunması isə 34 yaşlı Arzu Musayeva və 30 yaşlı Səbuhi Məmmədov tərəfindən həyata keçirilib. Əməliyyat nəticəsində R.Sivadass, A.Musayeva və S.Məmmədov saxlanılıb. Digər şəxsin saxlanılması istiqamətində isə beynəlxalq axtarış elan edilib.
İlkin araşdırmalara əsasən, zərərçəkmişlərə ümumilikdə 2.5 milyon manata yaxın maddi ziyan vurulub. İstintaq gedişində zərərçəkmişlərin sayının və vurulmuş ziyanın məbləğinin artacağı istisna olunmur. Faktla bağlı Cinayət Məcəlləsinin müvafiq maddələri ilə cinayət işi başlanılıb, araşdırmalar davam etdirilir.
DİN bir daha vətəndaşları onlayn platformalarda qarşılaşdıqları, iqtisadi əsası olmayan piramida sxemlərinə, həmçinin "Any Unboxing" tipli saxta qazanc vəd edən tətbiqlərə inanmamağa çağırır.
