Azərbaycanda bir qrup insan icbari qaydada ödənişli təlimlərə cəlb olunacaq.
Oxu.Az-ın "Qanun nə deyir?" rubrikasının bugünkü mövzusu həmin şəxslərin kimliyi ilə bağlıdır.
Belə ki, xüsusi icra məmurlarının və onların köməkçilərinin ixtisasının və peşə hazırlığının artırılması məqsədilə təlimlərin keçirilməsi qaydaları təsdiqlənib.
Təlimlərin əsas məqsədi xüsusi icra məmurlarının və onların köməkçilərinin fəaliyyətinin səmərəliliyini artırmaq, onların nəzəri və praktiki biliklərini inkişaf etdirmək, həmçinin vəzifələrinin icrası ilə bağlı peşəkar vərdişlərini təkmilləşdirməkdir.
Təlimlər hər iki ildən bir icbari qaydada keçiriləcək.
Xüsusi icra məmurlarının köməkçiləri üçün ixtisasartırma təlimləri onların icra fəaliyyətində iştirak imkanlarının genişləndirilməsinə, öz səlahiyyətləri çərçivəsində müstəqil işləmək bacarıqlarının formalaşdırılmasına və peşə biliklərinin artırılmasına xidmət edəcək.
İxtisasartırma təlimləri aşağıdakı mövzuları əhatə edir:
- icra icraatının, o cümlədən icra sənədlərinin növləri üzrə icraatın aparılması xüsusiyyətləri;
- xüsusi icra məmurunun fəaliyyətində tətbiq olunan qanunvericilik;
- məhkəmə qərarlarının icrası sahəsində praktiki problemlər və onların həlli yolları;
- təlim ehtiyaclarına uyğun digər sahələr.
İxtisasartırma üzrə təlim ehtiyacları aşağıdakı qaydada müəyyən edilir:
- xüsusi icra məmurlarının fəaliyyətinə nəzarətin nəticələri əsasında;
- xüsusi İcra Məmurları Palatasının təklifləri əsasında.
Müəyyən edilmiş ehtiyaclar əsasında hər il ixtisasartırma üzrə təlim planı Ədliyyə Akademiyası tərəfindən Palata ilə razılaşdırılmaqla hazırlanır, Akademiyanın Elmi Şurası tərəfindən qəbul edilir və rektor tərəfindən təsdiqlənir.
Təlimin vaxtı və yeri barədə iştirakçılara ən azı 10 gün əvvəl məlumat verilməlidir.
Təlimlər ödənişli əsaslarla və bağlanılmış müqaviləyə müvafiq olaraq həyata keçiriləcək. Ödənişin məbləği Ədliyyə Nazirliyi ilə razılaşdırılmaqla Akademiya tərəfindən müəyyən ediləcək.
Təlimə görə ödəniş təlimdən əvvəl həyata keçiriləcək.
Təlimdə iştirakın üzrlü səbəblərdən mümkün olmadığı hallarda iştirakçı bu barədə əvvəlcədən məlumat verməli və üzrlü səbəbi təsdiq edən sənəd təqdim etməlidir. Bu halda o, növbəti təlimə cəlb edilir.
İştirakçı təlimdən kənarlaşdırıldığı hallarda ödəniş geri qaytarılmır.
Yekun qiymətləndirməyə yalnız təlim proqramı üzrə nəzərdə tutulmuş dərslərin azı 80 faizində iştirak etmiş şəxslər buraxılacaq.
Qiymətləndirmənin nəticələrinə əsasən müvəffəqiyyət qazanmış şəxslərə beş iş günü müddətində müvafiq şəhadətnamə veriləcək.
Şəhadətnamənin forması Palata ilə razılaşdırılmaqla Akademiya tərəfindən müəyyən ediləcək.
Qiymətləndirmənin nəticələrindən narazı qalan iştirakçı bu barədə nəticənin ona məlum olduğu gündən beş iş günü müddətində Akademiyanın rəhbərliyinə müraciət edə bilər. Bu halda iştirakçının şikayəti araşdırılır və üç iş günü müddətində ona müvafiq izah verilir.
İştirakçının şikayəti haqlı olduqda ona şəhadətnamənin verilməsi təmin edilir.
