Azərbaycanın Xalq artisti Tofiq Mövləvi vəfat edib.
Oxu.Az xəbər verir ki, Cəlil Məmmədquluzadə adına Naxçıvan Dövlət Musiqili Dram Teatrının aktyoru, Azərbaycan Respublikasının Xalq artisti, Prezident təqaüdçüsü, aktyor-rejissor Tofiq Mövləvi bu gün vəfat edib.
Xatırladaq ki, Tofiq Mövləvi 1938-ci il iyulun 1-də Naxçıvan şəhərində teatr aktyoru və rejissoru Səməd Mövləvinin ailəsində dünyaya göz açıb. O, hələ Naxçıvan şəhər 1 nömrəli orta məktəbdə təhsil aldığı illərdə Naxçıvan teatrında kiçik rollarda oynayıb. 1954-cü ildən taleyini Naxçıvan səhnəsinə bağlayıb. 2014-cü ilədək burada çalışıb, Azərbaycan və dünya dramaturqlarının əsərləri əsasında hazırlanan tamaşalarda 100-dən çox müxtəlif xarakterli obraza həyat verib. Onun "Qız atası", "Şeyx Sənan", "Ana", "O olmasın, bu olsun", "Atabəylər" və başqa əsərlərdə bir-birindən maraqlı rollar oynayıb. Özünəməxsus ifa tərzi, səhnə mədəniyyəti ilə böyük tamaşaçı sevgisi qazanıb.
Tofiq Mövləvi, eyni zamanda, Naxçıvan Xalq teatrında "Gənclik" studiyası yaradıb, həvəskar gəncləri cəlb edərək maraqlı tamaşalar hazırlayıb. Hazırda muxtar respublikada teatr sahəsində yaxşı tanınan Xalq artistləri Şirzad Abutalıbov, Kamran Quliyev, Yasəmən Ramazanova ilk səhnə addımlarını məhz Tofiq Mövləvinin studiyasında atıblar.
Səhnə fəaliyyəti dövlət tərəfindən yüksək qiymətləndirilən Tofiq Mövləvi 1974-cü ildə muxtar respublikanın, 1987-ci ildə Azərbaycan Respublikasının "Əməkdar artist"i, 2008-ci ildə isə "Xalq artisti" fəxri adlarına layiq görülüb. 2005-ci ildən Prezidentin fərdi təqaüdçüsü idi.