Son günlər bəzi vətəndaşlara özlərini "Məhkəməyə hazırlıq şöbəsinin" əməkdaşları kimi təqdim edən şəxslər tərəfindən zənglərin edilməsi narazılıq yaradıb.
Oxu.Az xəbər verir ki, sosial şəbəkədə yayılan iddialara görə, həmin şəxslər, əsasən, gənc qadınlar olur və onlar "Azpulmat" adlı kredit təşkilatına borcu olan şəxslərlə əlaqə saxlayaraq, borcun bir gün ərzində ödənilmədiyi təqdirdə işin məhkəməyə veriləcəyi ilə hədələyirlər.
Məhkəməyə verildikdə isə icra qərarı çıxarılacağı və vətəndaş borcunu ödəyənə kimi məhkəmə xərcləri ilə yanaşı, hər günə 7% hesablanacağı bildirilir.
Məsələ ilə bağlı Oxu.Az-ın sorğusunu cavablandıran "Azpul" MMC (Azpulmat) BOKT-dən bildirilib ki, faiz dərəcələri, ödəniş müddəti və cərimə sanksiyalarının hesablanması qüvvədə olan normativ-hüquqi aktlarla tənzimlənir.
"Şirkətimizin fəaliyyəti 18.09.2020-ci il tarixli BKT-34 saylı lisenziyaya əsasən həyata keçirilir və Azərbaycan Respublikasının qanunvericiliyi, eləcə də tənzimləyici qurumun bütün tələbləri çərçivəsində aparılır.
Müştərinin kredit üzrə öhdəliyi gecikdiyi halda "Azpul" MMC qanunvericiliyə uyğun olaraq öz maraqlarının müdafiəsi üçün məhkəməyə müraciət etmək hüququna malikdir. Məhkəməyə müraciətdən əvvəl məlumatlar məhkəməyədək xidmət şöbəsinə yönləndirilir və burada əməkdaşlarımız müştərilərlə əlaqə saxlayaraq borcun məhkəməyə qədər, hər iki tərəfin maraqlarını nəzərə almaqla ödənilməsini təklif edirlər.
Müştəriyə məlumat verilir ki, şirkətin məhkəmə icraatına çəkdiyi xərclər, qanunvericiliyə əsasən, müştərinin üzərinə düşür. Bundan əlavə, məhkəmə icraçısına icra sənədində göstərilən məbləğin 7%-i həcmində rəsmi komissiya ödənilməlidir.
Əgər müştəri borcunu ödəmirsə, iş qanunla nəzərdə tutulmuş prosedurlara uyğun olaraq məhkəmə icraçısına ötürülür. Bu mərhələdə yalnız səlahiyyətli məhkəmə nümayəndələri tərəfindən rəsmi bildirişlər və zənglər həyata keçirilə bilər.
"Azpul" MMC-nin əməkdaşları müştərilər üçün istənilən uyğun vaxtda zəngləri qəbul edir, məsləhət verir, suallara cavablandırır, təklif və şikayətləri qəbul edirlər.
Hər hansı qanun pozuntusu ilə rastlaşdıqda müştərilərimizi dərhal 24/7 rejimində fəaliyyət göstərən "1670" Çağrı Mərkəzi ilə əlaqə saxlamağa çağırırıq", - deyə məlumatda bildirilir.
Əzizə İsmayılova
:640.jpg)
