Bağçalarda kişi tərbiyəçi işləyə bilməz?! - RƏY

Azərbaycanda illərdir belə bir tendensiya yaranıb ki, kişilər bağçalarda tərbiyəçi işləyə bilməz. 

Bunu Oxu.Az-a açıqlamasında Psixoloq Vəfa Rəşidova bildirib.

Onun sözlərinə görə, bağçalarda kişi müəllimlərinin olması mütləqdir:

“Əgər valideyn kişi tərbiyəçisi olan bağçaya uşağını yollamaq istəmirsə, müəllimin pedofil olma şübhəsi varsa, həmin şəxs məktəbə uşağını yollayanda da güvənsiz olacaq. Bu, valideynin qorxusu, şəxsi yanaşmasıdır.

Bu, düzgün yanaşma deyil. Bu cür düşünmək haradasa eşitdiyi və travma aldığı düşüncədən irəli gəlir. Çünki bu gün bağça, məktəblərin ərazisində pedofil var ki, qorxurlar”.

Oxu: Azərbaycanda kişilər niyə müəllim işləmək istəmirlər?

Psixoloq bildirib ki, bağçalarda, məktəblərdə müəllimlər işə götürülmədən əvvəl psixoloji müayinədən keçirilməlidir: 

“O zaman valideynlər də uşaqlarını işini bilən mütəxəssislərə etibar edə biləcəklər. Tərbiyəçilər, müəllimlər bu cür müayinədən keçmədikləri üçün valideynlər etibarsız yanaşır, uşaqlarını onlara etibar etməkdən çəkinirlər”.

“Uşaqlar üçün kişi və qadın müəllim obrazı mövcuddur. Bağçada onların tərbiyəsi ilə qadın müəllimlər məşğul olur. Bu zaman uşaqların xarakterinin formalaşması tam olmur. Bağçalarda kişi müəllimlərin olması oğlanların kişi kimi yetişməsinə zəmin yaradır.

Ətrafımızda o qədər natamam ailə var ki, onlarda ata obrazı əskik olur. Bağçalarda kişi tərbiyəçi bu cür uşaqlarda kişi obrazının nümunəsini yarada bilər. Ən önəmli məqam budur və biz bunu ötürürük. Müəllim sahəsinə hörmət edən olsa, valideynlərin qorxusu olmaz”, - deyə psixoloq qeyd edib.

İlhamə Əbülfət
www.oxu.az

Oxu.Az yeniləndi!

ANDROID əməliyyat sistemli smartfonlar

iOS əməliyyat sistemli smartfonlar