Baş həkimlə ədavəti olan keçmiş aptek müdiri poliklinikaya od vurdu

Bakıda 9 saylı Şəhər Poliklinikasında baş verən yanğının təfərrüatı məlum olub.

İddia olunub ki, vaxtilə Rüfət Rəhimov adlı şəxs sözügedən tibb ocağında çalışıb və baş həkimlə ədavəti olub.

Elə buna görə də, Rüfət Rəhimov baş həkimin otağına daxil olub, ətrafa benzin töküb və otağı yandırıb. Yanğın nəticəsində otaqdakı bütün əşyalar yararsız hala düşüb.

Poliklinika işçilərinin sözlərinə görə, yanğını törədən şəxsin psixoloji problemləri var:

"Aptek müdiri olub. Dörd-beş il burada işləyib. Qonşusundan soruşdum, dedi ki, psixoloji problemi var, ailəsi dağılıb, əyyaşlıq edir".

Daxili İşlər Nazirliyindən (DİN) bildirilib ki, yanğını törədən 1984-cü il təvəllüdlü Rüfət Rəhimov polis əməkdaşları tərəfindən saxlanılıb, araşdırma aparılır.

Ətraflı Baku TV-nin süjetində:

Baş həkimlə ədavəti olan keçmiş aptek müdiri poliklinikaya od vurdu

17:06

"Bu gün təxminən saat 14:15-də Binəqədi rayonu, 9-cu mikrorayon ərazisində fəaliyyət göstərən Bakı Baş Səhiyyə Mərkəzinin nəzdində olan 9 nömrəli Şəhər Poliklinikasında yanğın qeydə alınıb".

Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Məlumata görə, dərhal hadisə yerinə çağırış üzrə Fövqəladə Hallar Nazirliyinin Dövlət Yanğından Mühafizə Xidmətinin qüvvələri və təcili tibbi yardım briqadası cəlb edilib.

"Yanğın qısa müddət ərzində söndürülüb. Xəsarət alan yoxdur.

Yanğını törətməkdə şübhəli bilinən şəxs hüquq-mühafizə orqanları tərəfindən saxlanılıb. Hazırda faktla bağlı araşdırma aparılır", - deyə məlumatda qeyd olunub.

15:34

Bakıda 9 saylı poliklinikada baş verən yanğın söndürülüb.

Bu barədə Oxu.Az-a Fövqəladə Hallar Nazirliyinin Mətbuat Xidmətindən məlumat verilib.

15:24

9 saylı şəhər poliklinikasında baş həkimin iş otağına od vuran şəxs saxlanılıb.

Bu barədə Oxu.Az-a Daxili İşlər Nazirliyinin Mətbuat Xidmətindən məlumat verilib.

Qeyd olunub ki, yanğını törədən 1984-cü il təvəllüdlü Rüfət Rəhimov polis əməkdaşları tərəfindən saxlanılıb.

Faktla bağlı araşdırma aparılır.

14:52

Bakıda xəstə baş həkimdən sənəd ala bilmədiyi üçün onun iş otağına benzin tökərək yandırıb.

APA xəbər verir ki, hadisə 9 saylı şəhər poliklinikasında qeydə alınıb.

Əraziyə Fövqəladə Hallar Nazirliyinin əməkdaşları cəlb olunublar, yanğının söndürülməsi istiqamətində işlər aparılır.

Xəsarət alanın olmadığı bildirilir.

Əlavə məlumat veriləcək.