Azərbaycan-Ermənistan qoşunlarının təmas xəttində vəziyyət yenidən gərginləşib.
Oxu.Az xəbər verir ki, yerli sakinlərin APA-ya verdikləri mlumata görə, bu gün axşam saatlarından başlayaraq Tovuz rayonunun Əlibəyli kəndi Ermənistan silahlı birləşmələri tərəfindən intensiv atəşə tutulub.
Azərbaycan Ordusu düşmənə adekvat cavab verib.
Tovuz Mərkəzi rayon Xəstəxanasının baş həkimi Paşa Muradovun APA-ya verdiyi məlumata görə, atışma nəticəsində Tovuz rayonunun Əlibəyli kəndinin iki sakini, 1997-ci il təvəllüdlü Fərid Nəbi oğlu Məmmədov və 1962-ci il təvəllüdlü Anya Qara qızı Ələkbərova yaralanıblar. Onlar Tovuz Mərkəzi rayon Xəstəxanasına yerləşdiriliblər.
Xəstəxananın baş həkinin müavini Səyyad Yusifov isə APA-ya bildirib ki, Fərid Məmmədov çənəsindən güllə yarası alıb. Anya Ələkbərovaya isə qarının ön divarının küt travması diaqnozu qoyulub. “Görünür, ona güllə dəyməyib. Güllə harasa dəyib və Anya Ələkbərova ya gülləbarandan qaçanda, ya da başqa bir şəraitdə xəsarət alıb”, - baş həkimin müavini deyib.
Müdafiə Nazirliyinin mətbuat xidmətindən APA-ya faktı təsdiqləyiblər. Bildirilib ki, Ermənistan silahlı birləşmələri Tovuz istiqamətində atəşkəs rejimini pozub. Azərbaycan Silahlı Qüvvələrinin bölmələri düşmənə cavab atəşi verir. Hərbçilər arasında ölən və ya xəsarət alan yoxdur.
Qeyd edək ki, hadisədən bir az sonra Tovuzdan seçilmiş millət vəkili Qənirə Paşayeva yaralılara rayon xəstəxansında baş çəkib.
Tovuz Mərkəzi rayon Xəstəxanasının baş həkimi Paşa Muradovun APA-ya verdiyi məlumata görə, Bakıdan mobil – tibbi briqada Tovuza yola düşüb.
“Mütəxəssislər xəstələrə baxacaqlar. Ehtiyac olsa, onlar Bakıya aparılacaq. Tərəfimizdən hər iki xəstəyə lazımı bütün tibbi müdaxilələr edilib”, deyə P.Muradov bildirib.
23:40
Tovuz rayonunun Əlibəyli kəndində döyüş gedir.
Oxu.Az musavat.com-a istinadən xəbər verir ki, ermənilərin aramsız açdıqları atəş nəticəsində 2 kənd sakininin yaralandığı deyilir.
“2 saatdan artıqdır ki, fasiləsiz olaraq ermənilər kəndimizi iri çaplı silahlardan atəşə tutur. 2 yaralımız var. Onlardan biri Anya Ələsgərovanın vəziyyəti ağırdır”. Bu həyəcanlı xəbər bir neçə dəqiqə əvvəl Tovuzun Əlibəyli kəndindən alınıb.
Kənd sakinlərindən birinin veridyi məlumata görə digər yaralının da vəziyyəti ağırdır. Düşmənin fasiləsiz atəşi nəticəsində 10-a yaxın ev yararsız hala düşüb. Kənd sakini deyib ki, düşmənin mövqeyi Əlibəylini atəş altında saxlamaq üçün əlverişlidir: “Bizim mövqelərimizdən onların kəndlərini adekvat şəkildə atəş altında saxlamaq olmur. Bundan istifadə edirlər. Camaatın mal heyvanı küçələrdə qalıb. Hər kəsə atəş açırlar”.
Kənd sakini deyib ki, ordumuz düşmənə cavab verir.
Tovuz rayon Mərkəzi xəstəxanasının baş həkimi Paşa Muradovun verdiyi məlumata görə, Əlibəylidə yaralananlardan birinin vəziyyəti ağırdır.
“Güllə onun boyun nahiyyəsindən girərək sifətində dayanıb. Hazırda onun əməliyyat edilməsi üçün hazırlıqlar gedir”, - deyə baş həkim bildirib.
