Orta məktəblərin altıncı sinif coğrafiya dərsliyində yer alan siyasi xəritədə Azərbaycanın sərhədləri ilə bağlı qeyri-dəqiqlik müşahidə olunur. Xəritəyə baxarkən ərazi təsvirində sərhədlərlə bağlı uyğunsuzluq açıq şəkildə nəzərə çarpır. Bu hal sosial şəbəkədə ciddi narazılıqla qarşılanıb. Eyni zamanda, bəzi suallar yaradıb: Dərsliklər təsdiqlənməzdən əvvəl hansı yoxlama mərhələlərindən keçir? Xüsusilə xəritələr kimi vizual materialların dəqiqliyini təmin etmək üçün hansı mexanizmlər tətbiq olunur? Bütün bu mərhələlərə baxmayaraq, dərsliklərdə belə ciddi fakt və təsvir xətalarının - məsələn, Azərbaycanın sərhədləri ilə bağlı yanlışlıqların yer alması hallarında hansı addım atılır?
Məsələ ilə bağlı Oxu.Az-ın sorğusuna cavab olaraq Elm və Təhsil Nazirliyindən bildirilib ki, Azərbaycan Respublikasında ümumi təhsil pilləsi üçün hazırlanan dərsliklər Azərbaycan Respublikası Nazirlər Kabinetinin 2020-ci il 25 fevral tarixli 67 nömrəli Qərarı ilə təsdiq edilmiş "Ümumi təhsil müəssisələri üçün dərsliklərin, dərs vəsaitlərinin və digər tədris-metodik vasitələrin hazırlanması Qaydası"ndakı meyarlar əsasında qiymətləndirilərək keçid balını topladıqdan sonra istifadə üçün təsdiq olunur.
Nazirlikdən bildirilib ki, dərsliklərin qiymətləndirmə meyarlarından biri isə "dərsliyə daxil edilmiş materialların elmi etibarlılığı, dəqiqliyi, inkişafyönümlülüyü, tərbiyəyönümlülüyü, dəyəryönümlülüyü, şagirdlərin yaş xüsusiyyətlərinə uyğunluğu"dur ki, həmin meyar çərçivəsində dərsliklərdə dəqiqliyin, elmi etibarlığın gözlənilməsi, eləcə də səhv məlumatlara yol verilməməsi fənlər üzrə mütəxəssislər tərəfindən yoxlanılır.
Dərslikdəki xəritə ilə bağlı məsələyə gəldikdə isə nazirlikdən qeyd edilib ki, xəritə tərtib etmək kifayət qədər həcmli və məsuliyyətli dövlət əhəmiyyətli iş olduğu üçün dərsliyi hazırlayan müəssisənin və müəllif heyətinin xəritə yaratmaq səlahiyyəti yoxdur:
"Bu səbəbdən, dərslikdə yer alan xəritələr mötəbər elmi və təsdiqini tapmış mənbələrdən əldə edilir. Sözügedən dərslik onu hazırlayan nəşriyyat-poliqrafiya müəssisəsinə təqdim edilib və müvafiq addımların atılması bildirilib".
Aləmdə Nəsib
