"Abituriyentlər ixtisas seçimlərində birinci yerdə ən çox istədikləri ixtisası yazmalıdırlar".
Oxu.Az xəbər verir ki, bunu Dövlət İmtahan Mərkəzi (DİM) İdarə Heyətinin sədri Məleykə Abbaszadə qurumun sosial şəbəkə hesabında keçirilən canlı yayım zamanı abituriyentlərə müraciətində bildirib.
O qeyd edib ki, abituriyentlər gələcəkdə sevdikləri peşə ilə məşğul ola biləcəkləri ixtisası seçməlidirlər:
"Elə bir təhsil almalısınız ki, gələcəkdə sevdiyiniz peşə ilə məşğul olasınız. Özünüzə sual verin: Niyə məhz bu peşəni seçirsiniz? Ola bilər ki, həmin peşə cəmiyyətdə yüksək nüfuza malikdir. Lakin düşünməlisiniz ki, seçdiyiniz ixtisas gələcəkdə sizə sevdiyiniz işi təqdim edəcək, yoxsa yox.
Faktiki olaraq, biz sizə qərar qəbul etmək alqoritmini təqdim edirik. Hər insanın öz seçimi, hər ailənin isə öz məhdudiyyətləri var. Hansısa ailədə tələb var ki, gənc dörd ildən sonra işləməyə başlasın, digəri isə övladının dörd ildən sonra da təhsilini davam etdirməsinə dəstək olur. Elə valideyn var ki, övladının uzaqda təhsil almasını istəmir.
Bütün bu məhdudiyyətlər müxtəlifdir. Özünüz müəyyən edin ki, bu məhdudiyyətlər çərçivəsində istədiyiniz ixtisaslar arasında topladığınız balla hansı seçimi etmək daha əlverişlidir.
Ən çox istədiyiniz ixtisası birinci yerdə yazmalısınız. İndi qərar qəbul edirsiniz, 5-10 ildən sonra isə sizi nələrin gözlədiyini düşünməlisiniz.
Hansı ixtisaslara əmək bazarında tələbat artacaq, hansı sahələrdə yaxşı iş imkanları yaranacaq? Elə ixtisaslar var ki, 10 il sonra onlara tələbat olmayacaq. Məsələn, 10 il əvvəl "Gömrük işi" ixtisası var idi. İndi isə gömrük orqanlarında müxtəlif sahələr üzrə mütəxəssislər çalışa bilərlər.
Siz müəyyən etməlisiniz ki, bu ixtisasa sahib olduqda harada işləyə biləcəksiniz və gələcəkdə həmin ixtisasa tələbat olacaqmı?"
