Bu il 4 minə yaxın şəxs müəllimlərin işə qəbulu üzrə müsabiqədən uğurla keçib.
Oxu.Az Trend-ə istinadən xəbər verir ki, bunu Təhsil Nazirliyinin İnsan resursları şöbəsinin müdir müavini Eşqi Bağırov deyib.
Onun sözlərinə görə, bu ilki müsabiqədə iştirak üçün 50 minə yaxın namizəd qeydiyyatdan keçib. Onların 40 mini müsabiqənin test mərhələsində iştirak edib.
E.Bağırov bildirib ki, müsabiqənin müsahibə mərhələsində 400-ə yaxın namizəd uğur qazana bilməyib.
E.Bağırov müsabiqədən narazı olanların müraciətlərinə baxılma üçün Təhsil Nazirliyində Apelyasiya Komissiyasının yaradıldığını da deyib: “Namizəd Apelyasiya Komissiyasında uğur qazana bilmədiyi halda da müddətli əmək müqaviləsi ilə işləmək üçün şans qazanır. Həmin müəllimlərin il ərzində yaranan vakant yerlərə müddətli əmək müqaviləsi ilə işə cəlb edilməsi üçün tədbirlər həyata keçirilir. Əgər həmin müəllimin dərs dinləmələri zamanı nəticələri qənaətbəxş olsa, biz tədris ilinin sonunda onun müqaviləsini daimi etməyə hazırıq”.
10:57
Azərbaycanda müəllimlərin işə qəbulu müsabiqəsinin nəticələri açıqlanıb.
Oxu.Az xəbər verir ki, Təhsil Nazirliyindən report-a verilən məlumata görə, müəllimlərin işə qəbulu üzrə müsabiqənin yekun mərhələsi (müsahibə) başa çatıb. Namizədlərin nəticələri şəxsi səhifələrinə göndərilib. Müsahibədən uğurla keçib müəllim adını qazanan namizədlər sentyabrın 5-dək təyin olunduqları müəssisələrdə və ya yerli təhsili idarəetmə orqanlarında qeydiyyatdan keçməlidirlər.
Müvafiq keçid balını toplayan, lakin müsahibə mərhələsindən keçməyən namizədlər 5-7 sentyabr tarixlərində keçiriləcək növbəti yerləşdirmədə iştirak edə bilərlər.
Apellyasiya Komissiyasına müraciət etmək istəyənlər 29-30 avqust tarixlərində Təhsil Nazirliyinin Telefon Məlumat Mərkəzinə (“Qaynar xətt” xidməti, telefon: 146) zəng edə, office@edu.gov.az və Vətəndaşların Qəbulu Mərkəzi vasitəsilə qeydiyyatdan keçə bilərlər.
Apellyasiyanın keçiriləcəyi vaxt və yer barədə məlumat namizədin şəxsi səhifəsinə göndəriləcək.
