"Müharibə başlayanda qardaşım cavan oğlan idi, Gəncədə Kənd Təsərrüfatı İnstitutunda oxuyurdu. Özü könüllü olaraq döyüşə gedib".
Oxu.Az xəbər verir ki, bunu bu gün dəfn olunan itkin-şəhid Rafiq Hüseynovun qardaşı Murad Hüseynov deyib.
"Rafiq çox vətənpərvər oğul idi. O vaxt döyüşə könüllü getdi. Sırxavənd istiqamətində gedən döyüşdə 1992-ci ildə itkin düşüb. İtkin düşmə xəbərini alandan sonra çox axtarışlar etdik, amma heç bir nəticə olmadı. Qardaşımın adını oğluma vermişəm onu yaşatmaq üçün.
Allah dövlət başçımızın canını sağ eləsin. Dövlətimizin sayəsində şəhidimizin nəşi tapıldı və bu gün biz onu dəfn edə bildik. Allah bütün şəhidlərimizə rəhmət eləsin, o cümlədən də qardaşıma", - deyə M. Hüseynov qeyd edib.
Əzizə İsmayılova
