Lənkəran rayonunun Gərmətük qəsəbə ərazisində baş verən yol-nəqliyyat hadisəsi zamanı iki nəfər xəsarət alıb.
Bu məlumat Oxu.Az-ın sorğusuna cavab olaraq Tibbi Ərazi Bölmələrinin İdarəetmə Birliyindən (TƏBİB) verilib.
"Noyabrın 28-də axşam saatlarında baş verən yol-nəqliyyat hadisəsi nəticəsində iki nəfər (qadın cinsli) baldırın səthi travması, yuxarı ətraf və bazunun travması diaqnozları ilə Lənkəran Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunublar.
"Yaralılara zəruri ilkin tibbi xidmətlər göstərilib, xəsarət alanların vəziyyəti qənaətbəxş olduğundan ambulator müalicə üçün evə buraxılıblar", - deyə məlumatda vurğulanır.
Əzizə İsmayılova
Lənkəranda çağırışa gedən təcili tibbi yardım avtomobili qəzaya uğrayıb.
APA-nın verdiyi xəbərə görə, hadisə axşam saatlarında, köhnə Ələt-Astara magistralında, Lənkəran rayonunun Gərmətük qəsəbə ərazisində baş verib.
Belə ki, rayonun Aşağı Nüvədi kəndindən çağırış olub. Əraziyə yaxın olan Şürük kənd Təcili və Təxirəsalınmaz Tibbi Yardım briqadası həmin ünvana çıxış edib.
Tibbi yardım avtomobili Gərmətük kəndi ərazisində hərəkətdə olarkən "Mercedes-Benz" markalı minik maşını tibbi yardım avtomobilinə çırpılıb.
Qəza nəticəsində tibbi yardım avtomobilində olan tibb bacısı və həkim xəsarət alaraq Lənkəran Rayon Mərkəzi Xəstəxanasının Təcili tibbi yardım şöbəsinə hospitalizasiya olunublar. Xəsarət alanlara ilkin tibbi yardım göstərilib.
Qeyd edək ki, iki gün bundan əvvəl də Astaradan Lənkərana xəstə gətirən təcili tibbi yardım avtomobili Lənkəranda qəzaya uğramışdı.
Faktla bağlı araşdırma aparılır.
