Abşeron rayonu, Qobu qəsəbəsində yaşayan sakinlər Lökbatan-Qobu yolunun, eləcə də Sona Salmanova küçəsinin işıqsız qalmasından və bunun yaratdığı təhlükəli vəziyyətdən narahatdırlar.
Oxu.Az-a daxil olan şikayətdə bildirilir ki, qəsəbəyə gedən yolda ilyarımdır ki, zülmət qaranlıq müşahidə edilir.
Qobu sakinləri QARANLIQ küçədən şikayətçidirlər#Qobu #sakinşikayəti #Oxuaz pic.twitter.com/PK7d6UKyda
— Oxu.Az (@oxuaz) July 29, 2025
Ərazidə piyada zolaqlarının olmaması problemi daha da dərinləşdirir. Sakinlər qeyd edirlər ki, xüsusilə yağışlı havalarda yol keçilməz olur, nəticədə məcburiyyət qarşısında qalan piyadalar yolun hərəkət zolağından istifadə etməli olurlar. Bu da onlar üçün real təhlükə yaradır.
Bundan əlavə, qeyd olunur ki, yolun nəzarətsiz və işıqsız olması sürücülərin yüksək sürətlə hərəkət etməsinə səbəb olur. Sakinlər ərazidə təhlükəsizlik kameralarının və sürət radarlarının quraşdırılmasını da təklif edirlər.
Oxu.Az-ın sorğusuna Abşeron Rayon İcra Hakimiyyətindən (RİH) cavab olaraq bildirilib ki, ərazidə yerləşən gecə işıqlandırılması üçün çəkilən xətlərin və dirəklərin aidiyyəti qurumlar tərəfindən RİH-in balansına verilməsi ilə bağlı işlər aparılır:
"Hazırda bu işlər təhvil-təslim mərhələsindədir. Buna baxmayaraq, proses başa çatana qədər qəsəbə bələdiyyəsi tərəfindən cari təmir işləri aparılacaq və qısa zaman kəsiyində yaranmış problem aradan qaldırılacaq".
Xatırladaq ki, Abşeron RİH-dən sözügedən məsələ ilə bağlı 6 ay öncə verilən açıqlamada həmin ərazidəki kabel xəttində qəza baş verdiyi qeyd olunub. Bildirilib ki, lazımi avadanlıqlar sifariş edilib, yaxın günlərdə təmirə başlanılacaq.
Məhərrəm Əliyev
