Ağdamın “Dördyol-1” qəsəbəsindəki 1281 saylı evdə yanğın baş verib.
Oxu.Az APA-ya istinadən xəbər verir ki, Ağdamın Qiyaslı kəndindən məcburi köçkün düşən Mülayim Nəbiyevanın evini onun oğlu Sarvan Nəbiyevin yandırdığı ehtimal olunur.
Qohumlarının sözlərinə görə, Mülayim Nəbiyevanın oğlu Sarvanın davranışları ailə üzvlərini narahat edirmiş. Əvvəlcə onun həyat yoldaşı, daha sonra isə anası evi tərk edib. Psixoloji sarsıntı keçirən Sarvan Nəbiyev yaşadığı evi yandırdıqdan sonra oranı tərk edib.
Qonşular hadisə yerinə Fövqəladə Hallar Nazirliyinin Yanğından Mühafizə Xidmətinin əməkdaşlarını çağırıblar. Yanğınsöndürənlər üçotaqlı evdə alovun qarşısını almağa nail olublar.
Hadisə yerini tərk edən Sarvan Nəbiyevi Ağdam Rayon Polis Şöbəsinin əməkdaşları saxlayıblar.
