"Azərbaycanda pambıqçılıq üzrə yeni hədəflər müəyyənləşdirilib".
Oxu.Az "Report"a istinadən xəbər verir ki, bunu Prezidentin köməkçisi - Prezident Administrasiyasının Ərazi-təşkilat məsələləri şöbəsinin müdiri Zeynal Nağdəliyev "Azərbaycanda kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" çərçivəsində keçirilən pambıqçılığın inkişafı məsələlərinə dair müşavirədə deyib.
Onun sözlərinə görə, Dövlət Proqramının bitkiçilik məhsulları üzrə əsas alt-hədəf indikatorlarından biri olan pambıqçılıq ölkəmizdə kənd təsərrüfatının ənənəvi və strateji əhəmiyyət daşıyan sahələrindən biridir:
"Bu sahə yalnız xammal istehsalı baxımından deyil, həm də kənd yerlərində məşğulluğun təmin edilməsi, emal sənayesinin inkişafı, ixrac potensialının artırılması və aqrar-sənaye zəncirində əlavə dəyərin formalaşdırılması baxımından mühüm əhəmiyyət kəsb edir".
O qeyd edib ki, pambıqçılıq üzrə ixtisaslaşmış rayonların fermerləri və pambıqçılıq şirkətlərinin nümayəndələrinin iştirakı ilə keçirilən bu müşavirədə Dövlət Proqramında pambıqçılıqla bağlı qarşıda duran vəzifələr, eləcə də müəyyən edilmiş hədəflərə nail olunması üçün görüləcək tədbirlər müzakirə ediləcək.
