TƏBİB-in tabeliyində olan Sabirabad Rayon Mərkəzi Xəstəxanasında dörd ay əvvələ kimi direktor işləmiş Həsən Hüseynov cinayət məsuliyyətinə cəlb edilib.
Oxu.Az "Qafqazinfo"ya istinadən xəbər verir ki, eks-direktor külli miqdarda mənimsədə ittiham olunur.
Prokurorluqda aparılan istintaqla müəyyən edilib ki, o, direktor vəzifə səlahiyyətlərindən sui-istifadə edərək 186 min manatdan bir az artıq dövlət vəsaitini mənimsəyib.
H.Hüseynov həbs edilməyib, onun barəsində məhkəməsi başlayana qədər "başqa yerə getməmək" qətimkan tədbiri seçilib. O, vurduğu ziyanın 20 min manatını geri ödəyib, qalan pulu ödəməsi üçün isə şərait yaradılıb.
Ziyan ödənilmədiyi halda H.Hüseynovu ittiham edildiyi külli miqdarda mənimsəmə maddəsi ilə 5 ildən 10 il qədər həbs gözləyir. Yaxın günlərdə onun məhkəmə başlayacaq.
Qeyd edək ki, Həsən Hüseynovun Dövlət Gömrük Komitəsinin (DGK) keçmiş sədri general-polkovnik Səfər Mehdiyevin bacanağı olduğu bildirilir. O, ötən il xəstəxanada qadın işçilərdən birini döyməsi iddiası ilə də gündəmə gəlmişdi.
