Şəhid qardaşı: "Yusifi axırıncı dəfə 1994-cü ildə görmüşəm"

"Qardaşımın tapılma xəbərini eşidəndə yaşadığım hissi sözlə ifadə edə bilmərəm".

Oxu.Az xəbər verir ki, bu sözləri jurnalistlərə açıqlamasında Birinci Qarabağ müharibəsində itkin düşmüş şəhid Yusif Məmmədovun qardaşı Eldar Məmmədov deyib.

O, qardaşının təbiətən ağır biri olduğunu söyləyib:

"19 yaşlı, ağır təbiətli biri idi. Orta təhsilli idi. Evin ortancıl uşağı idi.

Qardaşımı axırıncı dəfə 1994-cü ildə görmüşəm. Özüm onu hərbi xidmətə yola salmışam. O vaxtlar mən 11-12 yaşında olardım. Səfərbərlikdən sonra könüllü olaraq xidmətə getdi".

Eldar Məmmədov qeyd edib ki, atası 10 il Yusifi axtarıb:

"Atam Azərbaycanı qarış-qarış gəzmişdi. Fevralın 8-i döyüşə gediblər, sonra xəbər gəldi ki, itkin düşüb.

O vaxtı onun nəşinin Gəncədə olduğu deyiləndə atam getmişdi. Onda paltar ilə müəyyən edirdilər ki, kimdir. Paltar ilə onu gətirəndə atam tərəddüd etmişdi. Çünki bir şəhidin məzarı üstündə 5 ailə dayanırdı. Hərəsində də bir paltar".

O tapılma xəbərini eşidəndə yaşadığı hissi sözlə ifadə edə bilmədiyini qeyd edib:

"İndi biz bilirik ki, artıq ziyarət edəcək yerimiz var. Gözümüz yoldan çəkildi. 3-4 gün bundan qabaq tapıldığını demişdilər. DNT analizi vermişdik".

Aygün Mirakif