Bu gün Qafqaz Müsəlmanları İdarəsinin (QMİ) din xadimləri üçün təşkil etdiyi təkmilləşdirmə kursunun açılışı olub.
Oxu.Az APA-ya istinadən xəbər verir ki, təkmilləşdirmə kursunun açılışında iştirak edən QMİ sədri Şeyxülislam Allahşükür Paşazadə, Milli Məclisin Sosial siyasət komitəsinin sədri Hadi Rəcəbli, parlamentin Aqrar siyasət komitəsinin sədri Eldar İbrahimov, millətlərarası, multikultiralizm və dini məsələlər üzrə dövlət müşaviri Kamal Abdulla din xadimləri üçün yaradılan şəraitlə tanış olublar.
Bir ay davam edəcək kursda Azərbaycan müxtəlif bölgələrdən cəlb olunmuş din xadimlərinə İslam Universiteti və Bakı Dövlət Universitetinin müəllimləri dini sahədəki qanunvericilik aktları, milli-mənəvi dəyərlərlə bağlı mühazirə oxuyacaqlar.
Kursda iştirak edən din xadimlərinə sonda sertifikat veriləcək. Bu müddət ərzində din xadimlərinə QMİ tərəfindən məvacib veriləcək, yataq, yemək və digər zəruri tələbatları ödəniləcək.
Bu, QMİ tərəfindən bu istiqamətdə təşkil edilən ilk belə kursdur. Gələcəkdə də belə kurslar davamlı olaraq təşkil ediləcək.
