Bu gün Novruzun ilk - Su çərşənbəsi qeyd olunur.
Baku TV Quba rayonunun Mirzəqışlaq kəndində yaşayan tatların bu günü necə qeyd etməsi ilə bağlı reportaj hazırlayıb:
Tatların Novruzla bağlı ən özəl adətlərindən biri Su çərşənbəsində təmizlik işlərinin görülməsidir. Kənd sakini Yeganə Paşayeva deyir ki, sakinlər səhər tezdən bulaqdan su gətirirlər və bu suyu evdə hamı içir:
"Xeyir-dua verə-verə həmin suyu evin divarlarına çiləyirlər. Bu sudan istifadə edərək buğdanı yuyurlar və Novruz xonçasının bəzəyi olan səməni hazırlığının ilk addımlarını atırlar".
Su çərşənbəsi süfrəsində çoxsaylı şirniyyat da yer alır. Kənd sakini Mehriban Məmmədova tatların məşhur təamlarından danışır:
"Bizim ən məşhur təamımız plovdur. Hər bir ailə Su çərşənbəsində bu gözəl neməti bişirir. Həmçinin buğdadan qovurğa hazırlanır, ona kişmiş, qoz ləpəsi və badam əlavə olunur".
