İstanbulda “Atatürk” hava limanında qadın və onun uşağında Ebola virusunun əlamətləri aşkarlanıb.
Oxu.Az ANS PRESS-ə istinadən xəbər verir ki, Nigeriyadan İstanbula gələn qadının və uşağının halı pisləşib.
Hadisə yerinə gələn həkimlər hər ikisini müayinə edib. Məlum olub ki, onlarda yüksək hərarət var və tez-tez qusurlar.
Ebola virusundan şübhələnən həkimlər qadın və uşağı dərhal xəstəxanaya aparıblar.
Qeyd edək ki, Qərbi Afrikada indiyə qədər ebola virusundan 1000-dən çox insan ölüb. Virus, əsasən, Sierra Leone, Nigeriya, Qvineya və Liberiyada geniş yayılıb. Bir müddət əvvəl avropalı həkim və rahib də bu xəstəliyə tutulmuşdu. Hazırda Liberiyada vəziyyət daha gərgindir. Hökumət ötən gün virusa yoluxma halları aşkarlanan 3-cü vilayətdə də karantin elan edib. Dünya Səhiyyə Təşkilatı Ebola virusu ilə əlaqədar beynəlxalq səviyyədə fövqəladə hal elan edib.
