Tovuz rayonunun Aşağı Quşçu kəndinin 1 nömrəli tam orta məktəbində tüstülənmə nəticəsində baş verən zəhərlənmə ilə bağlı təfərrüat məlum olub.
Oxu.Az xəbər verir ki, məktəbin şagirdi Rəbiyə Əhmədova Baku TV-yə açıqlamasında bildirib ki, dərsdə olarkən başqa bir sinifdə sobanın partlaması səsini eşidiblər:
"Həmin sinifdəki uşaqları çölə çıxardılar. Bizim sinfimizdə tüstü yox idi. 3 sinifdə tüstü çıxdıqdan sonra hamımızı bayıra çıxardılar. Tüstüyə görə halımız pisləşdi".
Hadisə ilə bağlı danışan valideyn Şahlar Quliyev isə zəhərlənən şagirdlərdən bəzilərinin vəziyyətinin yaxşı olmadığını qeyd edib:
"Övladım qaça-qaça gəlib dedi ki, soba partlayıb, uşaqlar tüstüdən zəhərləniblər. Yaxınlıqda yaşayırıq. Gələndə gördüm ki, təcili tibbi yardım maşınları məktəbdədir. Valideynlərdən bir neçəsi ilə əlaqə saxlamışam. Deyirlər ki, uşaqların vəziyyəti qənaətbəxş deyil".
Ətraflı süjetdə:
"Tovuz rayonu, Aşağı Quşçu kəndində yerləşən məktəbdə zəhərlənən 71 nəfərin hər biri evə buraxılıb".
Bu məlumat Oxu.Az-a Tibbi Ərazi Bölmələrini İdarəetmə Birliyindən (TƏBİB) verilib.
Tovuz rayonu Aşağı Quşçu kənd 1 nömrəli tam orta məktəbdə baş verən hadisə Elm və Təhsil Nazirliyi və tabe qurumlarının ciddi nəzarətindədir.
Bu barədə Oxu.Az-a Elm və Təhsil Nazirliyindən məlumat verilib.
Bildirilib ki, Qazax-Tovuz Regional Təhsil İdarəsinin rəhbərliyi xəstəxanada müalicəsi davam etdirilən şagirdlərə baş çəkib, onların vəziyyəti ilə maraqlanıb. Hadisə nəticəsində zərər çəkmiş şəxslərin hər birinin səhhəti diqqət mərkəzində saxlanılır.
Qeyd edək ki, hadisənin baş vermə səbəbləri müvafiq qurumlar tərəfindən araşdırılır. İctimaiyyətə əlavə məlumat veriləcək.
"Son məlumata görə, 71 nəfər Tovuz Rayonu Mərkəzi Xəstəxanasına hospitalizasiya olunub".
Bu məlumat Oxu.Az-a Tibbi Ərazi Bölmələrini İdarəetmə Birliyindən (TƏBİB) verilib.
"Zərərçəkənlər müvafiq şöbələrə yerləşdirilib. Onların hər birinə zəruri tibbi xidmətlər göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıb", - deyə məlumatda bildirilir.
Tovuz Rayonu Mərkəzi Xəstəxanasına hospitalizasiya olunanların sayı 60 nəfərə çatıb.
Bu məlumat Oxu.Az-a Tibbi Ərazi Bölmələrini İdarəetmə Birliyindən (TƏBİB) verilib.
Qeyd olunub ki, son məlumata görə, 60 nəfər Tovuz Rayonu Mərkəzi Xəstəxanasına hospitalizasiya olunub.
"Zərərçəkənlər müvafiq şöbələrə yerləşdirilib. Hazırda onların hər birinə zəruri tibbi xidmətlər göstərilir. Vəziyyətləri stabildir. Artıq 27 nəfər ambulator müalicə üçün evə buraxılıb", - deyə məlumatda bildirilir.
Tovuz rayonu, Aşağı Quşçu kəndində yerləşən məktəbdə zəhərlənənlər arasında müəllimlər və xadimələr də var.
Bu barədə Oxu.Az-a kənd sakini məlumat verib.
O qeyd edib ki, zəhərlənənlər II növbədə oxuyan və işləyənlər olub.
"Odun olmadığına görə əvvəl məktəbi qızdırmaq üçün ağac yonqarından istifadə olunurdu. Tüstü elə də çox olmurdu. Son günlər nəsə yeni yanacaq növü gətiriblər, adını bilmirəm, mal yeminə oxşayır. Onu yandırıblar. Bələdiyyə sədrinin dediyi baca tutulması səbəbindən baş verməsi də düz deyil. Baca tutulsaydı, bir sinifdə zəhərlənmə olardı. Amma bir neçə sinifdəki uşaqlar zəhərləniblər. VI sinifdən yuxarı uşaqlar olub", - deyə məlumatda bildirilir.
"Tovuz Rayon Mərkəzi Xəstəxanasına 55 nəfər hospitalizasiya olunub".
Bu məlumat Oxu.Az-a Tibbi Ərazi Bölmələrini İdarəetmə Birliyindən (TƏBİB) verilib.
"Respublika Təcili və Təxirəsalınmaz Tibbi Yardım Mərkəzinə 19 dekabr, saat 11:00-da Tovuz rayonu, Aşağı Quşçu kəndində yerləşən məktəbdə şagirdlər arasında dəm qazından kütləvi zəhərlənmə şübhəsi ilə çağırış daxil olub.
Çağırış ünvanına təcili tibbi yardım briqadaları cəlb olunub.
Saat 13:20 radələrinə olan məlumata görə, 55 nəfər Tovuz RMX-yə hospitalizasiya olunub. Zərərçəkənlər Təcili və təxirəsalınmaz tibbi yardım, Reanimasiya, Cərrahiyyə və Yoluxucu xəstəliklər şöbələrinə yerləşdiriliblər. Onların hər birinə zəruri tibbi xidmətlər göstərilir", - deyə açıqlamada vurğulanır.
Aşağı Quşçu kəndinin bələdiyyə sədri məktəbdə 20 nəfərin zəhərlənməsi ilə bağlı yayılan məlumatı təkzib edib.
Bələdiyyə sədri Tofiq Hüseynov Oxu.Az-a açıqlamasında bildirib ki, 10 uşaq tüstüdən zəhərlənib.
"20 deyil, 10 uşaqdır. Elə də ciddi məsələ deyil", - deyə bələdiyyə sədri bildirib.
Tovuz rayonunun Aşağı Quşçu kənd 1 nömrəli tam orta məktəbində 10-dan artıq şagirdin zəhərlənməsinin səbəbi məlum olub.
Qazax-Tovuz Regional Təhsil İdarəsindən Oxu.Az-a verilən məlumata görə ümumtəhsil məktəbinin iki sinfində pelet sobasının tıxanması tüstülənməyə səbəb olub.
"Məktəbdə əvvəlcədən yanğın təhlükəsizliyi ilə bağlı görülmüş tədbirlər sayəsində hadisənin yayılmasının qarşısı alınıb, şagirdlər və müəllimlər təxliyə planına uyğun olaraq təhlükəsiz yerə təxliyə ediliblər. Tovuz rayonu üzrə təhsil sektorunun əməkdaşları hadisə yerindədir. Tüstülənmə nəticəsində 20-nəfərə yaxın şagird özünü pis hiss edib və təcili-tibbi yardıma müraciət edilib. Onların səhhəti diqqət mərkəzində saxlanılır.
Hazırda aidiyyəti qurum tərəfindən hadisənin başvermə səbəbləri araşdırılır. Tədris prosesinin fasiləsizliyini təmin etmək üçün zəruri tədbirlər görülür", deyə məlumatda bildirilir.
Qeyd edək ki, ilkin məlumata görə, zəhərlənməyə məktəbin qızdırılmasında istifadə olunan sobanın səbəb olduğu və uşaqların tüstüdən zəhərləndiyi bildirilir.
Əzizə İsmayılova
Tovuzda zəhərlənmə faktı qeydə alınıb.
APA-nın yerli bürosunun məlumatına görə, hadisə rayonun Aşağı Quşçu kənd 1 nömrəli tam orta məktəbində qeydə alınıb.
Məktəbin 20-dən artıq şagirdi zəhərlənmə diaqnozu ilə xəstəxanaya aparılıb. İlkin məlumata görə, zəhərlənməyə məktəbin qızdırılmasında istifadə olunan soba səbəb olub.
