Bakı Dəmiryol Vağzalı, Sumqayıt Dəmiryol Vağzalı və "Koroğlu" dayanacağındakı turniketlərdən keçərkən üztanıma ilə ödəniş sistemindən yararlanmaq istəyən vətəndaşların qarşılaşdığı çətinlik aradan qaldırılıb.
Bu barədə Oxu.Az-a "Azərbaycan Dəmir Yolları" QSC-nin İctimaiyyətlə əlaqələr şöbəsinin müdiri Bəxtiyar Hacıyev məlumat verib.
O bildirib ki, hazırda "İos" cihazlarında qeydiyyat zamanı yeni nəsil şəxsiyyət vəsiqəsi ilə bağlı yaşanan çətinlik aradan qaldırılıb:
"İos" cihazlarından, "iPhone" mobil telefonundan istifadə edən vətəndaşlar "ADY Mobile" mobil tətbiqini yeniləyərək yenidən qeydiyyatdan keçə bilərlər. AZE və AA seriya siyahısına AB seriyası da əlavə edilib.
"Android" cihazlarında isə hazırda işlər davam edir, AB seriyası gün sonuna qədər əlavə olunacaq".
Bakı Dəmiryol Vağzalı, Sumqayıt Dəmiryol Vağzalı və "Koroğlu" dayanacağındakı turniketlərdən keçərkən üztanıma ilə ödəniş sistemindən istifadə etmək üçün şərait yaradılıb.
Bu sistemdən istifadə etmək üçün qeydiyyatdan keçmək istəyən bəzi vətəndaşlar çətinliklə üzləşiblər.
Bununla bağlı Oxu.Az-ın qaynar xəttinə müraciət ünvanlayan sakinlərin sözlərinə görə, yeni nəsil şəxsiyyət vəsiqəsi ilə sistemdə qeydiyyatdan keçmək mümkün deyil.
Onlar bildiriblər ki, "ADY Mobile" mobil tətbiqində "Üztanıma ilə keçin" bölməsinə daxil olaraq bu xidmətdən yararlanmaq istəyəndə qeydiyyat prosesində yeni nəsil vəsiqələrin seriya nömrəsinə uyğun bölmə yaradılmayıb:
"Şəxsiyyət vəsiqəsiylə qeydiyyatdan keçmək istəyəndə orada ancaq AA və AZE olan seriya nömrəsini seçmək mümkündür. Yeni nəsil vəsiqələr isə AB seriyalıdır. Bu seriya isə siyahıya əlavə olunmayıb. Xidmətdən yararlanmaq üçün biz nə edək?"
Məsələ ilə bağlı "Azərbaycan Dəmir Yolları" (ADY) QSC-dən Oxu.Az-ın sorğusuna cavab olaraq bildirilib ki, hazırda sözügedən məsələ ilə bağlı sistemdə iş aparılır:
"Yaxın günlərdə AB seriyası da siyahıya əlavə ediləcək, hazırda bununla bağlı sistemdə iş aparılır".
