Son günlər bölgəyə yağan intensiv və leysan xarakterli yağışlar nəticəsində Zaqatala şəhərinin içməli su təchizatını təmin edən əsas su mənbələrində ciddi fəsadlar yaranıb.
Bu barədə məlumat Oxu.Az-ın sorğusuna cavab olaraq Azərbaycan Dövlət Su Ehtiyatları Agentliyindən (ADSEA) verilib.
Bildirilib ki, hazırda şəhərin əsas içməli su mənbələrindən biri olan Zilbançayda suyun bulantılığı normadan dəfələrlə yüksək olduğundan mövcud durulducular suyun tələb olunan keyfiyyətdə təmizlənməsini təmin edə bilmir:
"Bu səbəbdən bulanıq suyun istehlakçılara verilməsinin qarşısını almaq məqsədilə həmin mənbədən anbara suyun qəbulu müvəqqəti dayandırılıb. Şəhərin digər əsas içməli su mənbəyi olan Meşləş-Talaçay istiqamətində isə baş verən güclü sel nəticəsində suqəbuledici qurğular və digər infrastruktur obyektlərinə ciddi ziyan dəyib.
Sel suları filtrlərin qapaqlarını sıradan çıxarıb, suqəbuledici quyulara və magistral su xətlərinə iri həcmdə daş, qum dolub.
Hazırda əraziyə giriş mümkün olmadığından həmin mənbədən anbara suyun ötürülməsi tamamilə dayanıb. Mövcud vəziyyətlə əlaqədar Zaqatala şəhərinin içməli su təchizatı müvəqqəti olaraq alternativ qaydada təşkil edilib.
Şəhər sakinlərinə əvvəlcədən hazırlanmış qrafik əsasında xüsusi maşınlar vasitəsilə içməli su çatdırılır. Bu məqsədlə Zaqatala Su Meliorasiya Sistemlərinin İstismarı İdarəsinin və digər aidiyyəti qurumların xüsusi texnikaları gücləndirilmiş rejimdə fəaliyyət göstərərək, əhalinin içməli su ilə təminatını həyata keçirirlər.
Bununla yanaşı, idarənin əməkdaşları tərəfindən xəstə, ahıl, əlilliyi olan və digər həssas kateqoriyaya aid vətəndaşların yaşayış ünvanlarına içməli suyun birbaşa çatdırılması təmin edilir. Hazırda selin yaratdığı fəsadların aradan qaldırılması istiqamətində bütün zəruri tədbirlər həyata keçirilir. Əraziyə giriş mümkün olan kimi zədələnmiş suqəbuledici qurğuların və digər infrastrukturun bərpasına dərhal başlanılacaq".
Qeyd edilib ki, Zaqatala Su Meliorasiya Sistemlərinin İstismarı İdarəsi hazırda gücləndirilmiş iş rejimində fəaliyyət göstərir, şəhərin içməli su təchizatının ən qısa müddətdə tam bərpa olunması üçün bütün zəruri texnika, canlı qüvvə və digər resurslar səfərbər edilib.
"Zaqatalanın su basan kəndlərində elektrik enerjisinin verilişi hər hansı bir qəza səbəbindən deyil, planlı şəkildə dayandırılıb".
Bu məlumat Oxu.Az-ın sorğusuna cavab olaraq "Azərişıq" ASC-dən verilib.
"Təhlükəsizlik baxımından bu işlər görülür. Zilban, Suvagil, Qəbizdərə, Sabunçu və Yuxarı Tala kəndlərində isə müəyyən problemlər yaranıb. Sel suları səbəbindən ərazidə işləmək bir qədər çətindir, amma hazırda əməkdaşlarımız iş başındadırlar. Yaxın 2-3 saat ərzində problem aradan qaldırılacaq. Şəhərin özündə elektriklə bağlı problem yoxdur", - deyə məlumatda bildirilir.
Yağan intensiv yağışlar və sel suları Zaqatala rayonunun bir sıra yaşayış məntəqələrinə ciddi ziyan vurub.
Oxu.Az-ın sorğusuna cavab olaraq Zaqatala Rayon İcra Hakimiyyətindən bildirilib ki, hazırda ən ciddi problemlərdən biri şəhərin içməli su təminatı ilə bağlıdır.
"Sel nəticəsində yaranan fəsadlar səbəbindən Zaqatala şəhərinin bəzi ərazilərinə suyun verilməsi təxminən 10 gün müddətində mümkün olmaya bilər. Eyni zamanda, İkinci Tala kəndində də içməli su təchizatının bərpasının 10-15 gün çəkəcəyi ehtimal edilir.
Ötən gün Vöhtala kəndi ilə əlaqə müvəqqəti olaraq kəsilsə də, əhalinin təhlükəsiz ərazilərə təxliyəsi həyata keçirilib.
Sel suları Vöhtala, Aşağı Çardaxlar, Bəhmədli və Lahıc kəndlərində də ciddi fəsadlar törədib. Meşleş kəndində isə təhlükəsizlik məqsədilə sakinlər təxliyə olunublar.
Hazırda adıçəkilən kəndlərdə elektrik enerjisinin verilişi hələ də bərpa edilməyib. Bundan başqa, Zaqatala şəhərinin "Qaqarin" adlanan ərazisində də dünəndən etibarən qaz və elektrik enerjisinin verilməsində fasilələr yaranıb. 1 saylı poçt binasını sel yuyub.
Həyətlərə su dolduğu üçün toyuq çüçə tələf olub, əkin sahələri, fındıq bağları, mövsümi tərəvəz sahələrinə ziyan dəyib.
Hazırda hava günəşlidir və aidiyyəti qurumların əməkdaşları selin fəsadlarının aradan qaldırılması istiqamətində işləri davam etdirirlər", - deyə məlumatda bildirilir.
