Estetik tibdə əsas tendensiyalardan biri daha təbii və harmonik nəticələrə üstünlük verilməsidir. Dermatoloq Rəna Soltanovanın sözlərinə görə, müasir yanaşmada məqsəd üz cizgilərini kəskin dəyişdirmək deyil, insanın fərdi xüsusiyyətlərini qoruyaraq daha balanslı görünüş əldə etməkdir. "Minimum dolğu - maksimum nəticə" prinsipi də məhz bu yanaşmanı ifadə edir.
Son illərdə estetik prosedurlara olan münasibət də dəyişir. Pasiyentlər artıq yalnız daha gənc görünməyi deyil, eyni zamanda üz ifadəsinin və fərdi cizgilərinin qorunmasını, nəticənin mümkün qədər təbii görünməsini istəyirlər.
Bu yanaşmada üzün yalnız bir nahiyəsinə fokuslanmaq əvəzinə, onun ümumi proporsiyası və harmoniyası qiymətləndirilir. Dolğunun miqdarı qədər onun hansı nahiyəyə və hansı məqsədlə tətbiq edilməsi də əhəmiyyət daşıyır.
Bu və digər müasir yanaşmalar 3 noyabr 2026-cı il tarixində keçiriləcək Estetik Tibb Konfransında müzakirə olunacaq. Tədbirin spikerləri dermatoloq Rəna Soltanova və Türkiyədən dəvət olunmuş Dr. Ahmet Atalık olacaq.
"Full face" yanaşması və müasir korreksiya texnikaları
Konfrans proqramında "full face" harmonizasiya mövzusu xüsusi yer tutacaq. Alın və orta üz dolğusu, saçdibi dolğusu, üzün müxtəlif nahiyələri arasında balansın yaradılması və "ceyran göz effekti" kimi aktual mövzular praktik nümunələr əsasında təqdim ediləcək.
Burada əsas diqqət ayrı-ayrı nahiyələrin korreksiyasından daha çox, üzün bütöv şəkildə qiymətləndirilməsinə və proporsiyaların qorunmasına yönəldiləcək.
Nəzəriyyədən praktikaya
Konfransın əsas fərqləndirici xüsusiyyətlərindən biri yalnız nəzəri təqdimatlarla məhdudlaşmamasıdır.
İştirakçılar canlı modellər üzərində keçiriləcək praktiki demonstrasiyalar zamanı prosedurların planlaşdırılmasını, tətbiq nöqtələrinin seçilməsini və müxtəlif texnikaların mərhələli şəkildə həyata keçirilməsini birbaşa izləyə biləcəklər.
Bundan əlavə, bir seans çərçivəsində bir neçə prosedurun kombinə tətbiqi və düzgün ardıcıllığın seçilməsi də praktiki olaraq nümayiş etdiriləcək.
Proqramda real klinik halların təhlili və müzakirəsi də yer alacaq. Müxtəlif klinik situasiyalar üzərindən fərqli yanaşmalar müqayisə ediləcək, iştirakçılar isə spikerlərə suallar ünvanlamaq və təcrübə mübadiləsi aparmaq imkanı əldə edəcəklər.
Estetik tibbdə əsas məqsəd - təbii nəticə
Müasir estetik tibdə texnologiyalar və prosedurlar inkişaf etdikcə, pasiyentlərin gözləntiləri də dəyişir. Artıq əsas məqsəd üz cizgilərini nəzərəçarpacaq dərəcədə dəyişdirmək deyil, insanın özünəməxsus görünüşünü qoruyaraq daha təravətli, balanslı və harmonik nəticə əldə etməkdir.
Estetik Tibb Konfransı bu istiqamətdə müasir yanaşmaların nəzəri və praktiki tərəflərini bir araya gətirərək, sahədə çalışan həkim və mütəxəssislər üçün təcrübə mübadiləsi platforması yaradacaq.
Doktor Rəna Soltanovanın "Instagram" hesabı: https://www.instagram.com/dr._rena
